【BB衫螢光劑測試 未必有害但可能係致敏源】

我因為工作需要買左部皮膚水油成份測試機，打開睇睇個說明書，發現有埋測試螢光劑功能啵！

我咪pat pat 痕拎丫仔個衣櫃d 衫去照。唔照由至可，一照嚇死我。佢差唔多極大部份衫都照到藍光，即係含螢光劑~

其實我好大部份衫都係向大牌子買，例如carter's, next, mothercare, uniqlo, mides.... 有少數係淘寶同上網買。

首先，先要明白甚麼是螢光劑？

螢光劑是一種可吸收光線或紫外線而反射藍白磷光的化學染料，在日常生活中主要用在洗衣粉、清潔劑、紙張、螢光燈等領域。有些衣物為了顏色鮮艷好看，加入大量的螢光劑來漂白。因此，很多號稱純棉的白色衣物，大部分是含有螢光劑的。

今次個測試結果真係令我好震驚，因為我手機影極都影唔到真實個藍光同白光狀況，所以我用「笑」表示不含/只有少量螢光劑，用「骷髏骨」表示有中等至大量程度螢光劑。

以下呢張圖有顯示結果。發現得淘寶一間店買既衫、係fb 泡菜媽買既背心、mides 既連身衣、美國買不知名牌子叫rolling stones 不含螢光劑，其他牌子都有。我有睇過係咪無論咩牌子只要淺色衫就有、深色就無呢？結果又唔係啵

雖然好多歐、美、日既研究機構長期研究證實，螢光增白劑並無致癌性，亦無毒害性，但對嬰兒、皮膚敏感既人可能會造成皮膚過敏症狀。好彩Jacob 皮厚，暫時都無試過出現過敏症狀。不過如果其他小朋友皮膚容易敏感就要小心d 啦！

就算d 衫聲稱係有機棉製造都唔代表係無螢光劑，所以各位媽媽揀衫真係小心。如果bb 本身皮膚易敏感，其實都可以買部機仔去check 下，雖然咁樣有d 奇怪，但總好過買到d 衫返黎搞到bb 周身痕。

最後，皮膚科醫生建議d 衫買返黎一定要先洗，雖然唔能夠完全洗走螢光劑，但仍然能有效減低其化學成份。綠色和平亦都建議：
* 最好選用棉質衣服，以質地柔軟、舒適為主，吸濕及排汗功效較佳；
* 選用不太多色彩、主要以米白色為主的內衣；
* 小孩可多穿二手衣服
* 盡量揀選設計簡單的衣服，表面沒有膠質、金粉、燙畫印花等，亦不要選擇鮮艷、圖案有厚度及有味道的衣服
* 避免選購一些標榜免燙的衣服，因使用了功能性物料，生產過程中可能會加上一些有害物質。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Jacob媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！