父母能夠成為孩子嘅朋友？ 父母感吃力不討好5件事

陀住BB嘅一刻，總會幻想自己會同BB成為親密無間嘅朋友、無時無刻會溫柔呵護BB⋯⋯直到BB出世後逐漸長大，開始有自我思想，會識得用哭喊、扭計、打罵去表達自己情感同需要嘅時候，媽媽們終於醒覺到，即使BB唔理解自己、甚至認定自己係「衰人」都好，為咗可以好好教育BB，令BB健康長大，原來媽媽有時都要「狠心一啲」，做以下5件自問係為BB好但BB毫不領情嘅5件事：

1. 為孩子擋開一切危險

BB總愛接觸新事物，尤其係用口品嘗唔同物件嘅質感、味道，但喺父母眼中，除咗BB嘅玩具之外，好多時BB拎嘅物品都有潛在嘅危機，如未清洗乾淨嘅物件、零食糖果或細小得有鯁喉風險等，每當爸爸媽媽發現BB如獲得至寶般玩弄手上嘅「唔合格玩具」，父母都會馬上搶去，唔知情嘅BB就會覺得係父母搶去自己嘅嘅、覺得父母係衰人！

2. 為孩子準備營養均衡嘅食物

通常媽媽都會好注重孩子嘅飲食，每日都會精心配搭唔同營養嘅食材畀BB，同時會避免畀BB進食過多調味料，一切只為BB嘅健康著想。如果BB有腸胃問題，如出現腸胃炎、便秘或腹瀉，媽媽更會小心BB嘅飲食，但往往會有唔知情嘅人畀BB餅乾零食，BB收到自然歡天喜地咁食，相反媽媽一見到呢啲會加重症狀嘅食物會即時沒收，然後換上BB唔鍾意食嘅蔬菜，亦會畀BB認為媽媽係衰人、畀自己零食嘅先係好人！

3. 限制子女使用電子產品

五光十色、不停轉換畫面嘅電子屏幕固然吸引，但對嬰幼兒嘅視力傷害同樣不能忽視，好多爸爸媽媽會限制BB每日最多睇一個鐘電視、甚至唔畀睇，但自己就習慣性撳下手機，令BB覺得「你自己就有得睇，我就唔睇得」，認為父母存心蝦自己！

4. 為子女穿著合適衣物

天氣暖或凍，爸爸媽媽都會根據每刻嘅溫度為BB改穿適合當刻溫度嘅衣物，但開始會揀衫著、又唔理解衣物同冷熱關係嘅BB，會覺得父母唔畀自己揀著想著嘅衫、覺得父母控制欲強，令開始想獨立自主嘅BB更抗拒父母嘅掌控！

5. 嘮叨子女遵守各種規矩禮儀

當BB識嘅語言愈多、活動能力愈強，開始會喺街上跑跑跳跳，爸爸媽媽都係時候教BB各種規矩禮儀，如「出街要拖實爸媽嘅手」、「唔可以自己過馬路」、「要排隊」等等，心急嘅BB會覺得父母好長氣，總係阻止自己隨心所欲想做嘅事。

Text：Mami Editorial