帶BB拜年有咩要注意？ 爸媽要知道5個注意事項

新年係與眾同樂嘅節日，相信好多親友都樂於見家族新成員嘅一面！爸爸媽媽想新年帶BB向親友拜年嘅話，亦有需要注意嘅地方：

1. 餵飽BB後出門

BB好容易感到肚餓，所以媽媽最好喺出門前先餵飽BB同幫BB換尿片，確保BB有一段時間唔會因為肚餓而哭喊，令出門搭車嘅時間更充裕。

2. 避免舟車勞頓

同一日內最好避免帶BB去唔同嘅地方拜年，尤其係要搭車先去到嘅地方，因為車廂內空氣唔流通、人流眾多，當中不乏患有傷風感冒人士，除咗令BB容易患上傳染病外，長時間留喺屋企以外嘅嘈雜同陌生環境亦會令BB感到不安同害怕，尤其係需要長時間瞓覺嘅初生BB。

3.確保帶上所需物資

照顧BB隨時需要用到唔同嘅物資同用品，如濕紙巾、尿片等、奶粉、奶樽等，仲需要準備後備衣服、瞓覺毛毯等，唔好因為拜年嘅地方近或諗住坐一陣就走，而大安旨意帶少樣物品，記住BB嘅哭喊係唔等人，當需要用到某樣嘢而又冇喺手嘅時候，媽媽就會非常狼狽。

4. 配合BB作息時間

每個BB都有特定嘅作息時間，如隔幾多個鐘要飲奶、沖涼、瞓覺，爸爸媽媽帶BB去拜年嘅時候都應確保唔會打亂BB嘅作息。即使同親友傾得興起、打麻雀打得忘形都好，都應記得定時照顧BB嘅需要同適時帶BB返屋企，因為BB嘅時間表一旦亂咗，除咗令BB無所適從外，爸爸媽媽想要重新調整過BB嘅時間表就會好難！

5. 唔好勉強BB接觸其他人

即使親戚好期待見BB一面，但爸爸媽媽都要為BB把好關、保護好BB！請親友觸碰BB前先洗手；婉拒吸煙人士、或身上噴有較濃烈香水／古龍水人士抱BB嘅請求，避免影響BB健康。另外，亦要顧及BB嘅意願，如果BB對某啲親友表現抗拒，如哭喊不止等，請好好抱返BB安撫，而唔好再嘗試畀BB繼續接觸親友，因為有可能係BB對某啲陌生面孔感到特別害怕，令到佢哋夜晚會有較大機會發惡夢！

Text: Mami Editorial