【2歲學前班首月心路歷程 小小貼紙大大威力】

1月開始澄寶寶每日有兩個鐘去 Learning Center 「返學」，由於係插班，冇試過半分離班，就直接自己返學。

爸媽擔心佢會喊太多日，所以早兩個月開始，就同澄每星期喺呢間學校上親子 playgroup，等佢可以喺我地陪伴下熟悉一下環境同老師。（之前做過皮紋分析，知道澄寶寶面對新事物係需要多d時間多d敢氣，皮紋師建議如果有爸媽拖佢踏出第一步會好好多）

早一個月開始，婆婆同澄買餸經過學校，都會話「婆婆會帶李澄黎學校，同老師唱歌食餅洗手畫畫跳舞，婆婆就去買餸，買完就接返你返屋企」，洗腦講足一個月，等佢知道婆婆會接返佢！另外，每日既親子共讀時間仲加入有關返學既書，其中「Spot goes to shcool」係比較有趣吸引，講狗狗 Spot 返學會同朋友玩、可以畫畫，玩玩具等等，仲係一本揭揭書，邊玩邊睇～

終於到第 1 日，全家都好緊張，由爸爸婆婆一齊送返學，出乎預期地冇喊而且好開心！ 當以為可以放心⋯⋯

第 2-4 日，返學時大喊，唔捨得婆婆 ; 放學好心急，揹住書包喺閘仔等婆婆。

之後既一星期都甲流病假中⋯⋯

第 5-7 日都係喊，不過一日比一日喊得少～

第8日放學時勁開心！老師送佢一張車車貼紙，全日都貼住喺手，好開心。原來，小小貼紙有大大威力，而家貼紙已經喺屋企既牆上面，澄兄間唔中都去睇下開心下！

第9日：原來學校唔受政府停課影響，冇帶澄兄返學

第10日：又病咗，好彩少事，好快好返

之後幾日都好開心返學 ! 會自己衝去學校，主動同婆婆揮手 bye bye，放學會乖乖坐喺度等老師叫名。

希望放完農歷新年假，唔會打回原形啦！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos： 湜澄媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧