BB每日因咩而喊？ 一人一個激嬲BB嘅舉動

BB係屋企嘅大老細，爸爸媽媽要隨傳隨到，將BB服侍周到。一旦爸爸媽媽有所怠慢，或做事唔合BB心意嘅時候，呢位老細嘅情緒就會即時大爆發，喊到拆天都似！

1. 搶走BB手上玩得興起嘅嘢

喺BB眼中，並無玩具同非玩具之分，只要有興趣，所有嘢都係自己嘅玩具！但喺爸爸媽媽眼中，BB手上隨時拎嘅隨時係危險物品，當玩到興起嘅「玩具」被爸爸媽媽伸手搶走，BB就算幾愛爸爸媽媽都會即刻「反面」！

2. BB想飲奶冇及時回應

BB嘅肚餓感可以話黎就黎，前一刻興高采烈玩玩具，下一刻就會因肚餓而爆喊你睇！爸爸媽媽要即刻坐熱樽奶／沖配方奶畀BB飲，但等唔切嘅BB就一邊大喊，一邊睇住你沖奶，可以話秒秒都咁煎熬。

3. 拒絕抱BB

爸爸媽媽都係人，有時人有三急或食食下嘢，BB忽然走埋黎扭抱，當拒絕BB嘅抱抱請求，BB就會即時惱羞成惱出絕招喊畀你睇，最後心軟嘅爸爸媽媽都係要滿足老細嘅要求。

4. 餵BB飲水

有啲BB非常討厭飲水，一見杯內嘅係果汁或奶，會好不猶疑飲晒佢；一旦發現係水，就會毫不留情推走佢，當爸爸媽媽堅決要餵BB飲水，BB就會嬲到又打又喊。

5. 唔畀BB落地行路

學識行路嘅BB非常自豪自己可以用一雙腿周圍走、探索新事物，但係一旦被爸爸媽媽抱走處理，BB就會吃奶嘅力都出埋，想要掙扎擺脫父母嘅束搏，喊得非常淒厲，以為係被人擄走！

Text：Mami Editorial

Photo Source： Pinterest