【同小朋友去雷公田飲農場鮮奶餵羊咩咩】

依家流感咁勁，我哋都盡量避免去啲人多嘅地方，唯有去郊外行下啦！而且今日天氣咁好，唔去郊外行吓好似有啲浪費！於是，一行四人就出發去雷公田飲牛奶、餵羊咩咩！

我地嘅目的地係元朗農場鮮奶有限公司。駕駛人士可以直接開車去嗰度。如果好似我哋冇揸車嘅，就可以喺荃灣地鐵站或者荃灣西地鐵搭51號巴士。

去到雷公田村站落車。

雷公田村行入去大約15分鐘，就會見到元朗農場。

喺村口落咗巴士，行入去嘅整段路都係好容易行嘅石屎路，我哋推埋BB車都冇問題！不過要注意一下都幾多車出出入入，要小心啲。

沿途經過幾個燒烤場，竟然一個人都冇，其實下次可以順便燒埋烤或者野餐~

行到見到乳牛pattern嘅大石就到喇！

羊咩咩已經喺度等緊大家！

入到去之後，Natalie見其他小朋友喺度餵羊，已經不停催我地去買草

$3一紮嘅草好抵玩，我地encore左幾次。

Natalie餵得好興奮，不停叫我地引開啲大隻嘅羊，等佢可以餵到啲羊Baby

細佬雖然唔識餵，但佢第一次見到羊咩咩，行行企企都好開心

餵完一大輪終於肯坐低食啲嘢，呢度最出名就係佢嘅鮮奶！於是我哋嗌左鮮奶、鮮奶芒果布甸、燒賣同埋餐肉煎蛋公仔麵！

鮮奶真係又濃又滑，本來想買盒返屋企，不過老闆話一個鐘內要放返入雪櫃，我哋驚趕唔切，唯有放棄啦☹️

雖然附近得呢度有嘢食，但佢嘅價錢都唔會離晒譜咁，收費好合理的。

走嘅時候發現，原來呢度係對住甲龍林徑嘅出口㗎！下次可以行完山之後先來食嘢????

**********************************************************************************************

農場鮮奶有限公司Farm Milk Co. Ltd.
地址：元朗石崗甲龍村雷公田78號
電話：2832 9218
營業時間：星期六至日及公眾假期: 09:00-17:30 星期一至五休息

**********************************************************************************************

喜歡我嘅分享嘅話，記住like同follow我個Facebook page呀:) https://www.facebook.com/natalie.nathan.mum/

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Nat媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！