【結束歷時3個月的黃疸症記】

阿女出院當日，姑娘話BB一切正常，無黃疸，我就一直大安旨意，以為阿女唔會有黃疸，但原來黃疸一般喺BB出世第3日後出現～

我約咗阿女出院第二日(即係出世第5日)去健康院磅重、洗臍帶

當日陪月望到阿女面色，已經話佢塊面黃

初時我都唔相信

直至姑娘check阿女心口，話佢黃疸指數偏高，我先相信

而且體重仲輕過出院，跌咗0.01kg

等見醫生嘅時候，我個腦一片空白，完全唔知點做

食奶前指數：252，食奶後：23x

由於我係全人奶餵哺，醫生話阿女黃疸指數偏高可以考慮補奶粉

一直希望以全母乳餵哺，唔想阿女食奶粉

我個腦再次一片空白

返到屋企，胡生即刻問人邊隻奶粉好

想比阿女食，亦9秒9買咗返嚟

而我問咗幾位全母乳餵哺嘅媽媽，佢哋都經歷過依個階段

吸收咗佢哋嘅經驗，我堅持餵母乳，唔補奶粉

陪月知道我嘅想法後，燉湯比我補身，再煲上奶湯我飲

亦叫我準時餵阿女食奶，即使阿女瞓咗都要叫醒佢食

經過一星期，日以繼夜，夜以繼日

無間斷，餵奶、掃風、換片，無限輪迴

阿女嘅黃疸指數由23x，跌到166

醫生話黃疸指數合格，唔洗覆診，一個月先返嚟打針

塊面都無之前咁黃

當堂覺得自己無白費心機，嗰個星期真係堅辛苦

加加埋埋每晚瞓唔夠6個鐘，每兩個鐘餵一次奶

兩個鐘係由食嗰刻開始計，半個鐘食奶

10-15分鐘掃風、換片，5-10分鐘喚醒寶寶

所以計計埋埋，個零鐘又要無限loop

因為阿女鐘意瞓覺多過食，加上黃疸指數已經合格

所以我不定時餵奶，等佢肚餓先比佢食

點知滿月嗰時再返健康院，黃疸指數：155

原來阿女仲未退黃，醫生就寫紙佢返QE抽血

上次醫生講到唔清唔楚

話阿女黃疸指數合格，唔洗返去覆診

令我誤以為阿女已經退咗黃

嗰刻嘅心情真係跌到落谷底

原來黃疸指數over 300為之超標

Under 180叫合格，under 70叫退黃

但當時醫生完全無話我聽

由於阿女未退黃，我又要好似之前咁

兩個鐘頭餵一次奶，食得多屙得多先快退黃

因為有黃疸嘅B鐘意瞓覺，好多時阿女食食下瞓著

叫佢又唔醒，嗰下真係令我好忟好焦急

返QE抽血前，胡生幫阿女申請咗公務員家屬身份

咁阿女就可以喺QE L座嘅公務員診所睇症

第一次返醫院，媽咪同我一齊去

登記後，姑娘幫阿女度身長、頭圍同磅重

然後等見醫生，再抽血，隔一星期返去睇報告

抽血目的係想睇下BB屬生理性黃疸or病理性黃疸

睇下BB會否患有先天膽管閉塞、肝功能是否正常

但食人奶嘅BB，一般退黃情況較慢

通常出世後3個月內會退晒

報告顯示阿女屬生理性黃疸，無先天膽管閉塞

黃疸指數亦跌至116，不過肝酵素偏高

安排一個月後再返醫院抽血

第二次返醫院抽血，阿女已經3個月人仔啦

報告顯示阿女已經退晒黃

慶幸嘅係阿女黃疸指數未高到要照燈

亦唔需要日日返醫院抽血

終於結束歷時3個月嘅生理性黃疸

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Floreta

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到：[email protected] 我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！