研究：孩子愈親近大自然 出現抑鬱、過度活躍情況愈少

喺煩囂嘅都市生活，兒童往往缺乏接觸大自然嘅機會，未能從小培養主動玩樂同健康飲食嘅健康生活模式，亦有唔少因為生活緊張而感到壓力同鬱悶。有見及此，香港大學生物科學學院Tanja Sobko博士同研究夥伴奧克蘭大學數理分析及研究部總監Gavin Brown教授，共同研發一套問卷題目（CNI-PPC），係全球首份有效量度兒童同大自然接觸度嘅工具問卷。問卷有16條題目讓家長回答，分四個範疇反映兒童同大自然的關係，包括： 「享受大自然程度」，「對大自然同理心」、「對大自然責任心」以及「對大自然事物留意度」。

研究團隊經詳細訪問493個育有2至5歲兒童嘅家庭後設計出問卷初步内容，再比對目前廣泛沿用作測量兒童心理質素同行為問題嘅「強項與困難」問卷，篩選出16條能有效反映幼童同大自然接觸度嘅問題。

調查結果發現，根據家長嘅觀察，子女同與大自然愈親密，其出現抑鬱、過度活躍同行為問題嘅情況會愈少，情緒問題亦會相對減少。研究又發現，願意對大自然負上責任嘅兒童會較少出現人際相處嘅問題。

Sobko博士指出，香港有廣闊同就近嘅綠化環境，90％家庭喺家居400米内都有綠園，接近世衛嘅目標，但佢哋就不曾善用呢啲資源設施。佢表示：「好多家長躲避大自然，呢個係源於錯誤嘅觀念，認爲自然界不衛生同充滿危機，令佢哋嘅下一代難免亦感染呢種思想。我哋經常見到公園或綠化區裏「遠離草地」、「不許踐踏草地」等標誌，令人不想接近。」

事實上，有好多研究發現人類多接觸大自然同綠化環境對健康有益處。2010年世界衛生組織歐洲區域第五次環境同衛生部長級會議，發表咗「在轉變環境中保障兒童健康」嘅帕爾馬宣言。為咗落實宣言承諾，世衛訂下「300米」嘅目標為兒童提供玩耍同運動綠化空間，即係喺家居嘅300米範圍内要有綠化的環境，供孩童舒展身心。

Text: Mami Editorial

Source： 香港大學