【有仔襯嫩生？年輕媽媽心理上會遇到唔少煩惱】

二十一歲時，我生咗仔仔——貝貝。我好認同有仔襯嫩生，因為年輕媽媽嘅身體恢復得快，腰都係第二日就出返嚟，健康狀況比較好。但係，喺呢一個盛行遲婚嘅社會，作為年輕媽媽，就有好多不為人知嘅痛苦……

年輕生仔似犯法　新朋友會好驚訝

每次我識到新朋友，佢地就會問：「吓？呢個你個仔？你睇落廿幾歲咋喎！」佢地會以奇異目光望住我同貝貝，一邊問一邊笑……我係廿幾歲，但生仔犯法咩……

刻薄同事唔畀面　瘋狂放暗箭

雖然，我有好多真心關心自己嘅同事，但世界上總係有啲年紀大、未有小朋友或者未結婚嘅人會眼紅你。同你傾計時，不停冷嘲熱諷，兜個大圈話你咁細個學人生bb，又乜又嘜，我嘅心中不禁火滾。

長輩永遠是對的　

有一樣嘢又係令人炆到想打人。就係無論你幾緊張bb， 睇幾多關於育兒的文章、書籍都好。長輩都會講一句：「唔係咁㗎，你識咩呀？」嚟潑你冷水，踩低你唔識湊仔，再抬高自己係一位完美母親。當你叫佢論證自己嘅說法時，佢地會回應你：「根本唔需要理據。」即係，我地老過你，所以我地啱。

一句講哂——你唔洗畀意見點湊自己個仔啦！

為母則強　為咗bb頂硬上

就算係屋企做開少少家務，都同一腳踢冇得比。成為媽媽後，我突然發現原來清潔用品都有咁多種，揀邊一款、點用都係學問。以前自己一個人好少煮飯，但有咗小朋友，為咗佢嘅健康，你就唔煮唔得。

理想與育兒　取捨唔容易

其實年紀尚輕嘅大家，都一定有自己想做嘅嘢，但係往往都好矛盾，因為追求理想同照顧bb係魚與熊掌——不可兼得。何況呢個年紀咩都未試過，又點會咁容易取捨到。

冇朋友明白

身邊嘅朋友同自己年紀相約，大部分未結婚又未生小朋友，佢地好可能會以為你日日係屋企瞓教、做少奶奶，總之就爽啦。無論你點解釋，都冇人明日夜煎熬，冇得連續瞓教有幾咁辛苦，餵奶餵到流血但過兩個鐘又嚟過有幾痛。

總之一句，有苦自己知……

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Ruby

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！