捱更抵夜令媽媽經常心火盛？ 用呢4款滋潤消燥湯水養好身體

自從生咗BB之後，唔單止忙足成日冇時間抖，好唔容易等到夜晚BB瞓著，自己終於可以上床休息，但一整晚BB都會扎醒喊幾次，中斷媽媽嘅睡眠。長期捱更抵夜，加上照顧BB壓力大，都會令媽媽嘅脾氣變得非常暴燥，抵抗力變差，感覺身體同精神都大不如前。想照顧好家庭，媽媽應該先照顧好自己，等小編推介4種消燥又滋陰嘅簡單食療畀各位媽媽調理身體啦！

1. 沙參玉竹煲瘦肉

沙參具有滋陰清肺、養胃生津而除虛熱治燥咳嘅作用，玉竹可以養陰滋燥、潤腸通便，蜜棗可以養心潤肺益氣，同瘦肉合而為湯，有效養生滋潤。

材料：沙參50克、玉竹50克、瘦肉或脊骨半斤、蜜棗1-2顆

做法：將上述材料加適量水共煲1個小時左右。

2. 雪耳百合木瓜糖水

百合味甘，能夠清心安神，補腦健脾，止咳潤肺，雪耳則能潤肺滋陰，養胃生津，清熱活血，補腦強心。

材料：雪耳50克、百合50克、木瓜一個

做法：將雪耳同百合加適量水共煲至熟爛，然後將木瓜去皮切塊，再加入糖水中。

3. 西洋參燉瘦肉

西洋參性涼味甘，除有補氣養陰嘅功效外，仲能夠清火生津，對捱夜後津液不足，口渴舌燥嘅人群有好好嘅療效。

材料：西洋參15克、瘦肉1兩

做法：將上述材料隔水燉一個半鐘左右。

4. 綠豆薏仁湯

綠豆薏仁湯可以清熱解毒，幫助緩解捱夜所帶來嘅疲勞。另外捱夜後嘅人會損失大量維生素C，而綠豆含有豐富維生素可以補充流失嘅維生素；薏米可減少因為捱夜而造成嘅眼睛損害。

材料：綠豆 1量米杯、薏米1量米杯、紅糖適量

做法：將綠豆和薏米分別浸洗乾淨之後，用武火先煮開，然後改文火慢煮，直至綠豆爛了，加入適量的紅糖就可。

Text: Mami Editorial

Photo Source： Pinterest