【屯門醫院催生記 來回地獄又折返人間】

順產真係需要好大勇氣，真係令媽媽們來回地獄又折返人間呀~

之前聽啲人話順產生仔好痛，但有幾痛呢，未生果一刻都未知驚，話說我9月26號預產期，一直都有爬文睇要生果時係點，好驚穿左水自己又唔知。就係我22號晚訓緊教果時，突然下面感覺”pat”一聲，有一堆水湧出尼，我即刻醒左彈起身去廁所望下，仲有血添，咁應該都係時候喇，果時係零晨4點。我即刻叫醒小B爸，平時最少要叫半個鐘先醒既佢竟然一叫就醒，神奇！我地一路準備我就一路啲水湧出尼，拎住條毛巾準備好坐車出發去醫院喇！

5:00am
去到醫院巳經要準備入產房，我一啲都唔痛訓係度等，因為電話都唔比帶所以只有係度呆等⋯之後隔離尼左個媽媽，佢一入尼就嗌，我心諗有咁痛？我實在太天真喇當時。

7:00am
過左2，3個鐘，護士check完都係一度都未開，咁就話要打催生劑，我都想快啲生所以就ok，打催生劑係唔可以食野同飲野既。果然打左無耐之後開始有啲反應喇，覺得有規律咁痛，但都唔係好痛既暫時～護士就比定個笑氣我話痛就吸啦，開始尼料喇，覺得痛喇我，但都仲忍到既，果時check只係開到2-3度。我一直都想打無痛針因爲我都真係好怕痛，所以我就問護士有無得打啦，結果護士話無呀今日星期日，下！星期日就無得打架咩？！我好失望咁係到典。

9:00am
護士比個電話叫我打電話叫小b爸上尼，佢上到尼，個陣痛開始頂唔住喇，但其實都只係開到4-5度，護士就教小b爸幫我按摩尾龍骨，但我巳經開始進入瘋狂狀態，每次陣痛都痛到入心入肺，個笑氣巳經吸到無哂氣，比我一手飛開左。

12:00pm
我痛到巳經癲左，感覺到小b要出尼喇，有種要痾既感覺，巳經開到8度喇，護士話準備生喇！之後係陣痛尼既時候就出力痾，痾左幾次，但我真係無力⋯根據小b爸講，小b個頭出左尼又入返去，出尼又入返去，咁係會比助產士鬧既。

1:00pm
試左幾次終於出左個頭喇，但我巳經虛脫⋯助產士即刻話小b個頭卡住左會好辛苦呀！可能果一刻啲母愛終於湧出尼，唔知邊到尼既力終於痾到成隻小b出尼喇！真係暈一暈，之後隻小b就伏左係我身上，我終於放鬆哂～但係，突然下身劇痛，原來要排返個胎盤出尼，助產士豪不留情咁大大力襟個子宮，因為話我子宮出血，又要止血，痛到我典尼典去，之後就到縫針，原來我係無剪到，係自己爆開左，醫生係有用麻醉藥既，不過用左等於無用，每下拮落尼都拮心拮肺！然後都係不斷襟子宮，超痛⋯好彩同一時間係咁望住小b同影相，終於捱過左喇～

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：小B媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！