【8個月全泵奶媽中途退奶又再度泌乳】

By Cherry on 14 Jan 2019

我家中有一隻出世時臍帶繞頸兩圈的馬騮女-Hailiah 晞晞。曾全奶粉到回奶後決心再度泌乳到全母乳，喜歡分享母乳心得、育兒資訊、煮BB餐、幫BB扮靚影相買嘢...最愛ig&fb及身患分享症的八十後媽媽。IG ID: Hailiah27

好似好耐無寫過母乳專欄，話說過往做咗8個月全泵媽，轉咗做全埋身年幾，我都會諗起追返母乳嗰段辛苦時刻。其實有頭髮邊個想做癩痢呀，點解我一開始做泵媽就係因為個女埋唔到身，因為我問題導致佢好難吸啜，仲記得岩岩生完入醫院餵奶房俾姑娘望到仲話睇我都好難餵到嫁啦！

https://www.youtube.com/embed/lpYkvFeTUBE

咁我之前都喺前幾篇講過我點解決定中途退奶又再度泌乳嘅經歷，令我再次體驗埋身餵哺母乳其實係因為「泵奶機」嘅幫助！嗰陣仲係新手媽媽嘅我以爲呢世都唔會有埋身嘅機會，但係點知有誤打誤撞俾BB成功埋身！後來身邊有經驗嘅媽媽話我知因為我剛生完BB嗰時有泵奶，而泵得多透過拉扯乳頭令BB比初時更容易吸啜，而且BB越大吸啜能力越強！所以我再次打破宿命，決心喺bb接近三個月嗰陣再追返母乳。

我都好感謝呢位「同伴」，雖然到宜家我都係埋身多，但偶然我俾婆婆湊晞晞我都會泵吓奶，最近舊嗰部泵奶機退役啦，我就換咗部新泵奶機，開頭都擔心部機適唔適合我呢？結果發現一用之下比我原來嘅更易引奶陣同舒服。

我又係嗰句啦，世界上無最好，只有適唔適合，但我都好想將自己嘅體驗同大家分享，等大家揀泵奶機都可以有多個Choice 吖嘛！喺好多地方都有呢隻 #Ulmuka奶泵機，佢係美國品牌、韓國製造！今日我就試吓用咗十五分鐘，發現泵奶力度適中，唔會吸到痛或者唔舒服！我用按摩mode 5分鐘左右就轉去泵奶模式，一邊c字按住乳房泵好快就引到奶陣！我諗大家都知泵奶唔係越大力越好，好似我當年唔識泵用到最大力泵岀血奶，諗返起都驚。