RunningMan主持HAHA擔心老婆事業發展 但又想有第3個BB

RunningMan近日喜事不斷，繼主持李米洙脫單後，另一主持HAHA老婆Star再度懷孕，噚日播出嘅RunningMan開頭就開咗個模擬記者會，畀主持回應一下喜訊，點知HAHA就爆出老婆懷孕原因。

39歲HAHA同圈內歌手Star已有2名仔仔，上月已傳老婆再度懷孕，由於係懷孕初期，所以無特別回應。HAHA指，其實見老婆生完2個仔仔後，唱歌事業變成空窗期，令到粉絲不斷等老婆出新品，但宜家又再懷第3胎，真係好對唔住。其後，主持劉在石就指粉絲真係好希望見到Star出嚟唱歌，跟住HAHA就爆出：「但係我忍唔住⋯⋯」全場主持都嚇親，不斷問HAHA「你忍唔住咩嘢？」場面爆笑。

HAHA亦指，第3個BB將會改名為「Song」，而在石就大讚HAHA幾叻改名，每個小朋友嘅名都相當有意思，大仔叫「Dream」、二仔叫「Soul」、第3個不論男女叫「Song」都好適合。

爆出老婆再度懷孕後，HAHA都被好多人埋怨，指「咁愛老婆，唔係應該要好好守護佢咩？」HAHA承認自己係罪人同壞蛋，坦言自己30%係想生第3個，但應該要因為老婆事業，停止依個想法，可惜自己守唔住，希望可以用畢生努力去彌補，會更加更加愛錫老婆。

Text：Mami Editorial