【回顧水痘來襲 BB頭仔似被菠蘿釘】

【回顧水痘來襲 BB頭仔似被菠蘿釘】

Bloggers 專欄媽媽日常須知
By MR. MOON & RAIN 甜心小屋 on 07 Jan 2019

2018過去...2019第一篇文...原來係想做過回顧...不過...身體健康最重要...選擇左為水痘做過紀錄...

十一月的某一個星期二...老公話自己好似作感冒...有少少喉嚨乾乾地...有少少周身骨痛...想食完飯就休息...個晚就發燒了...時燒時唔燒...燒左兩日...食又食得唔多...只係好想瞓覺...幾日放工回來食飽飯就瞓覺...當時...不以為然...因為...好似作感冒咁...

星期五晚上發現身上有幾點紅點...好似想發暗瘡咁...點知...星期六一朝起身就發現全面好多紅點...隨帶發現有幾點水疱...老公即時去睇醫生...驚嚇發現自己出水痘...

水痘...老實說...以前一直只係小學教科書見過...

活生生既水痘...真係第一次見...

醫生千叮萬囑要小心處理...因為...好容易傳染...

當時...我心存僥倖...大小姐同二小姐唔會傳染到...因為...老公以為自己作感冒開始已經自我隔離...

到確診左水痘...老公除了洗手間...真係不出房門...

後來姑娘講...同一屋簷下...係避無可避...

唯一幸運既係我媽媽話我細過出過...免疫左...

我可以照顧老公...唔怕傳染...

我同老公就諗定如果大小姐二小姐不幸中招要點做...

自從老公確診水痘...每一日我都會幫大小姐二小姐量體温...檢驗身上有冇紅疹...

小心翼翼咁隔離...老公好番兩星期就到大小姐發病...

原來一起真係好快...放學回來量過體温...隔左三個鐘就已經發燒起紅點...

當時即時打電話通知大小姐班主任...

第二日去睇醫生...確診左水痘就係一星期病假...

待一星期後覆診確保好番拎番醫生証明書先可以再番學...

回望三個...大小姐病情最輕...面珠得幾粒...係身同手最多...一星期病假就已經好番可以番學...

大小姐確診...我地已經打定輸數...二小姐應該不能倖免...

果然不出所料...兩日後...二小姐出左幾粒紅點...

相片攝於十二月八日...胳肢窩清楚見到水痘...


初初以為二小姐可能有少少抗體...病情唔會太嚴重...原來唔係...

星期日晚開始發燒...一覺瞓醒就高燒...食左退燒藥只係稍微降温...未能退燒...扭到爆炸...一定要抱住...一放手就喊...

相片攝於十二月十日...真正來料...


水痘多左好多...面珠仔...下巴仔同心口仔...胳肢窩同手腳摺位...片片包住的位置...一粒粒既水疱睇到痛在心上...同二小姐換片片要打醒十萬分精神...我係幾咁驚會整痛二小姐...頭仔好似菠蘿釘咁...多到數唔到...


老公放工回來就收拾細軟...同二小姐飛的去睇急症...分流半個鐘唔到就有醫生睇...醫生話二小姐燒唔退最好入院觀察...本身我倆早已預料要即時入院...

誰不知...醫生話係要隔離...不過可能同其他病既隔離病童一齊隔離...我同老公當堂嚇一嚇怕二小姐會感染其他病...醫生見到我倆的憂慮...着我們回家觀察一下...醫生叮囑我地幫二小姐降温...如果仍然唔退燒就即時再去急症...

番到屋企...二小姐就樹熊上身...一定要緊貼住心口仔先肯收聲瞓覺...

我抱住瞓...二小姐温度更高...只有交俾老公抱住二小姐瞓...我就幫二小姐敷頭仔...

未有稍稍降温...只有 KEEP 住高燒...

抱住一整晚...好似抱住個小火爐咁...妹妹中途有起過身有笑過有玩過...

臨近天光...妹妹望落唔係太精神...有點點呆...

我地即時出門飛的去急症...

醫生隨即要二小姐即時入院...入住隔離病房...

上到隔離病房...房中只有一張BB床安排好俾二小姐...不過...姑娘就提醒如果有水痘既病童會安排同房...我明白...我只係唔想二小姐再染上其他病...增添辛苦...


幫二小姐換上病童服唔容易...因為二小姐勁扭計...勁反轉身...

一換好就要我抱住...望住二小姐喊...心真的好痛...

好幸運...遇上收症的姑娘同醫生好好人...

未有硬要二小姐瞓落床做檢查...肯陪住我抱住二小姐一路行一路檢查...

經過醫生仔細咁睇過...

發現有幾粒水痘稍為紅...可能有少少發炎...導致高燒不退...

醫生話人人反應唔同...水痘一樣可以好嚴重...

發覺眼附近有幾粒水痘太近眼...有機會影響視力...我個心真係離一離...

早幾日睇醫生...我問過醫生水痘咁近眼怕唔怕菌入眼...

二小姐既水痘生喺眼既內角同埋生眼挑針既位置...

個醫生話唔會...兩樣野...叫我放心...

呢個醫生我真係從此BLACKLIST 佢...

其實...我地有個家庭醫生...睇左超過二十年...

家庭醫生可能想退休...家庭醫生既註診時間減少左...將所有開診既一半時間俾左師弟...

本身1516唔知睇唔睇佢好...不過...二小姐要睇醫生個時間撞岩係佢...

只有逼於無奈睇佢...一入去...佢只係確診左二小姐出水痘...

我地話二小姐有少少咳咳地...佢睇都唔睇下...

求求其咁...基本上佢完全冇掂過二小姐...

只開左退燒藥同止痕藥水俾二小姐...

我曾經有諗過可能個醫生睇個時未有咁嚴重...不過...

我唔願意再博...為妹妹物色另一個醫生...

我始終係要一個有心既醫生...懂得將心比己...

醫生開左消毒水俾二小姐沖涼浸下...開左眼藥膏俾二小姐搽...

開左退燒藥...抗生素同抗敏感藥俾二小姐飲...幫二小姐止痛止痕...

真係好多謝每一位姑娘...知道一個人搽眼藥膏難攪...一日五次咁幫二小姐搽...

老實說...如果唔係姑娘動手...做媽媽真係好難忍心咁捉實佢...

我諗我只會不停話乖啦乖啦...俾媽媽搽左眼眼先抱抱啦...

二小姐出盡力反抗...其實係幾惡攪架...

姑娘用被包實二小姐對手...叫我捉實唔好掙脫出黎...

姑娘就撐開二小姐對眼搽藥膏...過程中...二小姐發狂咁大叫大喊...

相片攝於十二月十一日...搽完第一次眼膏...


食左三支藥...二小姐未有呼呼入睡...

一定要捉實我先瞓着...攪左好耐先放到落床...


瞓左一陣...眼科醫生要檢查二小姐眼仔...叫醒剛剛入眼既二小姐...

二小姐放聲大喊...一個姑娘再次包實二小姐對手再捉實腳仔...一個姑娘固定頭仔...

醫生就動手檢查...大叫大喊既聲音真係下下錐心...可憐我既二小姐...

幸好...醫生話暫時唔見有影響視力...不過...為左安心起見...會幫二小姐約一個期覆診...

檢查完眼仔...一定要抱住瞓...唔肯落床...


到左五點幾晚間探病時間...我同老公夾手夾腳同二小姐用消毒水沖涼...

一路沖涼一路咁喊...想我抱抱...

只有輕輕淋下消毒水就上手...上手抱抱下又再次入睡...

入睡後可以放到落床瞓...


到左夜晚九點零鐘...到了平日二小姐瞓覺既時候...

食飽左奶就肯落床...可惜...隔左一陣要抄醒二小姐食藥...

食完藥喊一輪...安撫左再入睡...

直到零晨兩點幾再要起身食藥...食完再瞓到六點...

六點起身...燒退了...二小姐精神好左好多...扭少左...喊少左...


話說出院前顧問醫生帶住一班醫生來睇二小姐...佢仔細咁檢查二小姐...

見到二小姐退哂燒...明顯精神左...挑皮左...繼而咀仔唔停講野...佢話可以媽媽放心...

我問佢二小姐會唔會留有疤痕...

佢話暫時睇應該唔會..只要.二小姐傷口唔好傷及真皮層...叫我地番屋企小心護理...

跟住...隨後...佢話唔緊要啦...男仔好似張學友咁一樣可以好受歡迎架...

我就話...不過...佢係女仔黎喎...

醫生就笑住話係咩...係女仔咩?個樣咁似男仔既...

真係唔知點接落去好?


出院回家...要食多四日抗生素...

退燒藥用來止痛...抗敏感藥用來止痕...

搽眼藥膏避免細菌入眼...

消毒水沖多五日涼...避免水痘發炎...

幾日後...水痘慢慢開始結焦...

相片攝於十二月十七日...


可惜...二小姐經常用手仔捽面...捽甩未乾透既焦...令傷口留下凹痕...

凹痕係好礙眼...咁可以點...

望住二小姐既面珠仔...我情願一面凹痕既係自己...

已經發生...已經唔知可以點做...已經係改變唔到...

只有想住健康比一切重要...感恩水痘未有帶來嚴重併發症...

只有期望日子可以帶走痕跡...


頭上既蕉最終喺一月頭甩清啦...

相片攝於一月七日...

終於可以BYE BYE 你條水痘尾...唔想再見到你...


水痘對大肚婆影響可以好大...

唔好以為可以靠幸運避得到...

靠幸運不如靠自己避諱一下...孕期出街帶口罩啦...

特別係去做產檢...

陀住小雨去醫院做產檢...我真係見過好多病左既人唔帶口罩咁去陪孕婦產檢...

寄望病左既人自律帶口罩...不如自己帶...

水痘未發出就已經有傳染能力...小心為上...

管不了人地...但可以管到自己...求一個心安...

水痘是由水痘帶狀疱疹病毒引起的急性傳染病...多發生在12歲以下的兒童身上...雖然幾乎所有人於感染水痘後都會終身免疫...但水痘病毒仍可能潛伏在人體內...並可在多年後復發引致帶狀疱疹...俗稱生蛇...

~ 患者通常會出現發燒和痕癢的紅疹...

~ 紅疹大概於5天內陸續出現...最初出現於身軀...然後向面部和四肢散佈...

~ 這些紅疹先是扁平...及後形成突起的豆狀小水疱...小水疱維持約3-4天...然後變乾...結痂...

~ 患者通常約於2-4星期內痊癒...

~ 曾接種水痘疫苗仍可能感染水痘(稱突破感染)...其症狀通常較為輕微或較不典型...水疱數目亦軟少...紅疹通常以斑丘疹為主而非水疱...病程通常比未有接種疫苗者較短...

水痘可透過飛沫或空氣傳播...

亦可經由直接或間接接觸水痘或帶狀疱疹患者帶有病原體之水疱液...黏膜分泌物而傳播...

潛伏期 : 10-21天...通常14-16天

傳染期 : 通常由患者出疹前1-2天...至所有小水疱變乾...水痘的傳染性極高...尤其是在患者出疹的初期...

水痘屬於輕微疾病...並會自行痊癒...不過...有部分患者的傷口可能會出現細菌感染...抵抗力弱的人士和孕婦...患上嚴重的併發症如肺炎和腦炎的機會較高...初生嬰兒若染上水痘...病情會較嚴重...甚至危及性命...婦女在懷孕初期若染上水痘...可能導致胎兒出現先天性缺陷...

==============================

Text & PhotosMR. MOON & RAIN 甜心小屋

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

Follow Instagram: MamiDaily


水痘

Share to Facebook