【BB來了想一擊即中?經驗分享備孕必做5件事】

【BB來了想一擊即中?經驗分享備孕必做5件事】

Bloggers 專欄孕媽專區
By 包媽雲妮 on 03 Jan 2019

話說由婚禮當晚開始,新人聽得最多嘅一定係:「幾時生BB呀?」過時過節更加係日答夜答,有時係想先過下二人世界,有時係試咗好耐都未BINGO唔通又大大聲同你講咩……


B&W一早諗住先過一陣子二人世界,幸運地到我地想試造人時,當月開始試,兩星期後已知Bingo,一擊即中~~當然事前我地有做少量準備功夫,確保身心都準備好迎接小生命。未必人人適用,少少個人分享俾大家參考=)

1.      婚前檢查

結婚前其實已經做過婚前檢查,始終下半世有咩事對方都要照顧自己,CHECK清楚好啲嘅

【B&W手札】Ep.81 --- 婚前檢查·向另一半負責任

到婚後B生B太都心廣體胖,幸福肥指數急劇上升……加上身邊唔少朋友想懷孕先發現有子宮水瘤或卵巢多囊症等問題,造人前又CHECK下啦~

今次加錢做埋下腹盤腔位置超聲波,包括子宮卵巢等,婚展加購$430,比平時join平一半!買個安心相當值得~CHECK晒聽埋報告一切正常可以安心造人啦﹗詳細分享請睇雲妮手札~~

2.      DOWNLOAD備孕APPS

身邊朋友都推介呢個「瘋狂造人」APPS,紀錄返經期及周期日數,會根據輸入資料計出排卵日,及建議同房嘅日子。但當然啦排卵日子每個月有遲有早,想再準D可以每朝量體溫,或者買排卵試紙朝朝驗下就更準確。

B&W都尚算年輕又唔想俾太大壓力自己,並無買排卵試紙日日CHECK,只係單純知邊日排卵,跟返APPS建議日子同房,就成功了,非常簡單大家不妨一試。

更多包媽孕期分享,請FOLLOW https://www.facebook.com/winnie810corner/

3.      食營養補充品

懷孕時要食營養補充品好多人都知,但其實備孕時都要食定葉酸啦~根據家計會指引「醫學研究指出,葉酸有助胎兒中樞神經的初期發育,減低出現脊骨缺陷(脊骨裂)的機會,因此準備懷孕的婦女可補葉酸(每天400 微克),孕婦在懷孕的最初12周亦應維持這個分量。」

由於大家唔會知自己幾時BINGO,到驗孕CHECK到時已經懷孕起碼4、5周,所以備孕時就好食定葉酸啦﹗牌子無咩所謂最緊要份量夠400 微克,旅行時平平地買款香港都有售,大約一蚊一日,想知邊款請inbox雲妮手札。

4.      檢視家庭財政計劃

幾年前李麗珊喺廣告話:「養大一個小朋友要400萬」就算唔計通脹,又諗住BB只讀資助學校,仲唔會瘋狂報Playgroup及興趣班…即使係天生天養,始終屋企多咗一個人仔,尿片、奶粉(餵人奶都要有一兩罐看門口)、bb床bb車、揹帶等用品……一年要預返5到10萬都真係不為過

仲有懷孕期間,初期攰到無力買餸煮飯要出街食,好似包媽嘔到咁更加煮唔到啦…
【包媽孕記】大聲宣布「我懷孕了﹗」瘋狂孕吐佛系媽媽育成記

買補品買營養補充品、每月一次私家產檢(媽媽們會明白公院淨係摸肚聽心跳係唔會安心的…),就算公院生BB都大約用上兩三萬,仲要諗BB出世後邊個湊,長老幫手都要增加家用,呢筆數真係要計清楚,錢唔會喺天跌落嚟架……

5.      BOOKMARK心儀陪月/婦產科醫生

傳統上頭3個月唔會公開懷孕消息,除咗所謂怕小氣,懷孕初期都真係唔太穩定……不過有好多嘢其實頭3個月已經需要BK定架啦~

如果諗住請陪月嘅朋友,睇完《BB來了》應該都會好驚請著個地獄陪月員……如果有朋友用過當然最好啦~但剛BINGO又未講得點問人拎聯絡電話呢?

同埋真係唔好太老定,包媽5weeks時默默whatsapp咗10個陪月,當時只剩3個有檔期咋Oh my god!!!!! 所以諗住造人就拎定幾個電話就啱架啦~

而醫生方面當然啦市面上好醫生有好多,但性價比高嘅都會好搶手,例如有家人兩胎都搵嘅一位全城最平醫生,只接剖腹case埋單只需四萬多少少﹗基本上驗孕棒一驗到就要打去book位~遲咗又係無架啦~~最終因為想順產揀咗另一位醫生,同樣性價比高﹗(想知醫生名請inbox雲妮手札)

小小個人經驗分享,未必適用於所有人,但生BB始終係人生大事,早少少計劃下無妨呀~祝大家好孕。

==============================

Text & Photos:包媽雲妮

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

Follow Instagram: MamiDaily


Share to Facebook