為確保BB可以順利出世 孕媽媽喺懷孕期應注意嘅10件事

為確保BB可以順利出世 孕媽媽喺懷孕期應注意嘅10件事

孕媽專區
By Mamidaily on 31 Dec 2018

有咗BB之後,媽媽嘅身體已經唔止屬於自己,所以孕媽媽喺日常生活中需要注意嘅事都多咗,以確保自己同BB嘅安全,令BB可以順利出世同媽媽見面。

shutterstock_1079249468 (1)

1.少食多餐

懷孕期間,媽媽同BB都需要吸收足夠營養,維持生命同生長,而母體嘅營養都會優先供應畀BB,所以媽媽好容易會感到肚餓,建議媽媽每日維持少食多餐嘅飲食原則,切記唔好可暴飲暴食。

shutterstock_386453710 (1)

2.避免進食生冷食物

生冷食物如魚生、沙律、軟雪糕等,如受污染或未清潔乾淨,容易令孕媽媽喺進食後感染上李斯特菌。如孕媽媽感染李斯特菌,一般會出現輕微症狀,但可能會將病菌傳畀胎兒,導致流產、胎兒夭折,或令新生嬰兒患上敗血症或腦膜炎,係胎兒嘅頭號殺手!李斯特菌可以喺低溫環境下生存,亦可以喺受污染嘅冷藏食物中繁殖,只有烹煮過程先能夠殺死李斯特菌。

3.多攝取葉酸

喺懷孕初期,孕媽媽多攝取葉酸,可以有效減低胎兒先天性異常嘅風險。

4.避免煙酒

酒精同香煙都會對BB有嚴重嘅影響。酒精會影響BB嘅中樞神經,亦有可能引發胎兒酒精症候群;而香煙就有機會令BB發育不全、流產或早產。另外亦有高風險令BB出現兔唇、氣喘、學習障礙等等。

shutterstock_569820007

5.攝取足夠水分

充足嘅水分對胎兒相當重要,建議孕媽媽平時攝取多啲水分。

6.注意日常動作

孕媽媽應盡量避免長期站立、拎重物或爬高等等,減少意外導致流產嘅可能。

7.注意性生活

懷孕初期,BB嘅著床較唔穩定,所以應盡量避免性行為,如果無法避免亦要注意勿過度激烈,以及要特別注意清潔衛生。

8.慎用藥物

所有藥物都有分級別,有啲級別嘅藥物係可以經母體傳畀胎兒,胎兒吸收後有機會造成各種問題,如孕媽媽唔清楚藥物嘅級別同對胎兒嘅影響,喺用任何藥物前應先咨詢醫生嘅意見。

shutterstock_442550803

9.注意水溫

媽媽嘅體溫太高,有可能導致胎兒腦部、脊髓神經系統發育異常或缺陷。所以盡量少漫溫泉。喺沖涼時嘅水溫亦應避免太熱。另外亦要注意,水太涼亦有機會令子宮收縮,水溫最好控制喺40℃左右。

10.多休息

懷孕初期,孕媽媽會因為體內各種變化而特別容易感到勞累,所以需要適當休息,避免壓力過大而影響胎兒。另外亦應避免激烈運動同情緒有太大起伏,請時刻保持心情愉快。

Text:Mami Editorial

Follow Instagram: MamiDaily


Share to Facebook