BB來了又唔知點開口講 7個特別方法宣佈喜事

近兩年不論係自己身邊，定係娛樂新聞，定係去街行開行埋，都見到好多大肚媽媽或者聽到有人有咗BB，你所知道嘅佢地係用咩方式報喜架呢？到自己有咗又唔知點開口同親朋戚友講，不如就用一張相去表達。

超聲波相

最一目了然嘅方法就係直接公開超聲波相，但呢個方法比較適用於孕中期，因為初期BB仲係一粒豆咁，但孕中期可以影到明顯嘅BB側面／側身，構圖上亦到比較靚架。

BB物品

最常見係用BB鞋，表示有小生命黎到。又或者好似岑麗香咁用BB衫。如果已經知道係男仔定女仔，可以揀返粉紅色或者粉藍色，咁其他人就一望就知道。

砌出你想講嘅嘢

就如早前陳展鵬同單文柔一樣，佢地用左戒指同字母砌出兩人嘅名同"baby coming soon"嘅字句。用上爸爸媽媽嘅婚戒更加別具意義，想仿效嘅爸爸媽媽可以加埋預產期嘅日子，咁就可以更完整帶出訊息。

營造一家三口畫面

係相入面刻意留一個位置，營造一家三口嘅畫面。例如擺放三隻杯、三對鞋、三套餐具等等⋯都可以話比人聽黎緊將會有個小生命。

計數法

簡單又有趣嘅方法就係比條算式大家計，大家會好奇點解1+1=3／2+1=4，大家諗多陣就明啦！

畫出黎

未見肚又忍唔住想同大家分享喜訊可以點？唯有畫出黎啦！

同老公比肚腩

唔想淨係比自己個肚皮人睇？有BB緊係關老公事，拉埋老公一齊比下個肚啦！

Text : Mami Editorial
Photo Source : Pinterest , 單文柔@Instagram , 岑麗香@Instagram