令人懷念孕期嘅5件事

陀住BB雖然好多嘢都唔做得、行步路又重好多、瞓覺個肚又頂住，陀住個時就好想快啲卸貨，光陰一去不復返，到而家BB出左世又掛住陀住BB個時。唔知你地又有冇呢個感覺呢？

懷念胎動

最初陀住BB都唔會有太大感覺，始終肚又未大、又未感受到胎動，係比較無實感。但自從感受到胎動個刻，先有實感肚入面係確確實實有一個小生命。頭幾個星期，BB每郁一下，感覺都係好新奇有趣。直到後來每日都感受得到BB嘅郁動，久而久之係會無哂驚奇，一心只係想BB快啲出世。到BB出左世，個肚得返啲內臟係度，間唔中都好懷念肚入面有個BB係度郁下踢下，好想可以再得閒摸下、估下佢會邊度郁。

BB靜靜係肚內

BB出世後嘅相處係有形交流，但BB係肚入面唔單係肚度吸收營養同長大咁簡單，同媽媽嘅無形交流，兩個生命存在係同一個身軀入面，彼此唔需要用言語去溝通，呢種交流真係只有BB同媽媽先感受到。而家即使BB係度呱呱叫，媽媽都未必明白佢想要咩，所以BB係肚入面無得反抗，其實都幾好架。

放縱咁食嘢

自從一知道有咗BB，好多人都會話要食多啲嘢，自己亦都會恃住多左BB就食多左嘢。零晨、大清早又可以行使女皇嘅權力叫老公買宵夜同早餐、可以唔理卡路里咁不停食。畢竟減肥係女人嘅終身事業，只有陀住BB嗰時先可以放縱自己、忘記減肥。BB出左世之後，自己食幾多就係自己吸收返幾多，偶爾想大飲大食一番的話真係會好懷念孕期架！

自己圓滾滾、光滑嘅肚皮

就算生完之後點暴飲暴食，個肚幾大都唔會係實嘅，點都係"軟林林"嘅。以前陀住BB得閒就搓下個肚，打圈打圈咁。但而家就算點搓都無以前咁好搓，一係就變左推肚皮，一係就摸到自己嘅妊娠紋／開刀疤。

可以恃寵生嬌

女人一生除左小朋友時期爸爸會當自己係公主之後，就只有陀住BB嗰時老公會當自己係公主咁看待。望住老公阻止自己做操勞危險動作、好悉心咁呵護自己、想食咩老公就會買咩、唔想聞啲咩老公就設法辟味。BB出左世之後成為真正嘅媽媽，要一手一腳照顧BB、好多事情都要自己處理，唔可以再咁依賴老公。

Text : Mami Editorial