【出玫瑰疹的日與夜媽媽分享BB病徵同照顧小方法】

By Mimi JW on 24 Dec 2018

我叫Joey Wong，係上班族媽咪，亦係一位緊張大師嘅新手媽媽。育有1女兒心怡，現齡11個月。閒時鐘意爬文睇育兒分享，鐘意試新野，好物實評，傾訴湊仔心聲，同一班媽媽一齊加油。初為人母，想好好紀錄囡囡嘅成長，分享做媽咪嘅心得。

心怡出世後大概發過4-5次燒，唔知關唔關喺我個肚入面發過燒嘅原因，佢次次一發現有燒就好快咁會標到38.7~9度，而且仲會維持起碼3幾日。最可怕的係今年元旦嗰次，反覆燒左7日。今次打破左以往發燒紀錄，最高燒時有41. 2度。每次發燒醫生都會話有出玫瑰疹機會，因為始終未出過，而且5歲以下出玫瑰疹機會都大，發燒反應也相對大。要觀察小朋友情況會唔會有咩變化。因為未有經驗，對於呢個咁靚嘅疹名，都好好奇！上網搵下相關資料，預早了解個病徵同照顧方法。

而網上搵到嘅資訊同今次心怡發病期間有好多相同徵狀，以今次嘅經驗，我總結/節錄左部份：

出疹前(發燒前)係有高度傳染性嘅 (但因為唔會有發病前的任何病徵，所以好難提防或察覺己中招)；
高燒最少72小時(藥效過左又燒過，好反覆，甚至藥力只可維持低燒一陣)；
期間小朋友可能出現喉痛，胃口欠佳(心怡連最愛嘅蜜糖水都唔飲)，精神狀態完全正常(活躍的)，情緒會比較燥底(可能準備發疹前皮膚有唔舒服感覺)，醒訓，輕瀉肚痾，容易脫水(因為心怡唔太肯飲水，嘴唇好乾)；
留意手腳溫度而配合著衫，心怡有2日燒到成40度，但係手腳冰冷，開頭都唔知要加衫定減衫，後來婆婆話呢種叫”內燒”係要再高燒幾日嘅徵兆，手腳凍係發緊冷，應該要加衫保暖先，等暖番先再抹身降溫。果然係咁，手腳暖番後，發燒溫度都穩定番；
退燒後身體出現密麻紅點疹(疹量最多嘅時候，摸落去似起雞皮少少突起)；
個人會攰D，不過心怡想訓又唔肯訓，呢個時間係最扭計，扭到人都顛!!!!!!!
沖涼D水唔好太熱，我無落沐浴露，擔心令皮膚更乾；
聽老人家講分別用過金銀花同芫茜煲水浸浴；
著番棉質柔軟透氣衫，如果出汗要及時抹乾；
退燒後雖然出疹但胃口非常好；
玫瑰疹應該唔痕唔痛(見心怡無R佢，幫仍搽藥膏時，佢無縮無扭擰，佢自己摸住肚皮D疹都仲識笑)；
出疹第3日晚已經退左9成；
出疹後個傳染性已經好低，但都唔好番學住 (心怡成個星期無得番學，連第1個X’MAS PARTY都參加唔到了)；
玫瑰疹唔會復發，出過1次之後終身免疫；
知道出疹之後要通知之前曾經接觸過嘅小朋友，等屋企人可以留意住；

上星期六下午心怡突然訓醒後發燒，我地都嚇一嚇，之前咳同鼻水都無，無啦啦就嚟料!? 食左退燒水後夜晚反覆，發緊燒嘅佢竟然比平時更加合作同乖豬，望住佢燒到40度幾塊面紅卜卜，仲識對我微笑講Good Night，肉赤心痛到我想喊！

第2日係星期日，全日都持續39度上落，藥力退之後好快就嘭一聲標高。以往經驗，如果見佢精神正常又精伶嘅，係唔點食野同飲水，不過都唔太擔心住，可能出疹呢~ 加上星期日去睇其他醫生都係俾住退燒藥同觀察。

第3日星期一成晚都無乜訓，keep住久唔久溫水抹身，怕佢出汗換唔切紗巾，又密啲量體溫。今朝6點零醒左話要奶奶，點知體溫去到成40. 3度，即刻食多次藥等睇醫生。等緊見醫生時，心怡走黎走玩，又SIR滑梯又跑商場，但都手凍腳凍，凍到手指都有少少紫，嚇到要即刻抱實佢俾D體溫暖番。見完醫生番到屋企，港台咁岩做緊川奇症，攪到個人突然緊張晒，因為可大可小！夜晚氹緊訓我自已細細用氣聲諗地藏菩薩，心怡聽到喊住話唔好唱啦，我話okok，點知佢喊住話唱jingle bell啦！本來嘅擔心突然笑出聲!!

第4日星期二，食完藥，個人明顯地攰左，扭多左，扭到天昏地暗，可能身體真係好唔舒服，又唔識接達！阿媽我都頂唔順病病地…..心怡下午退過燒，晚上又燒番，不過已經無標到39度。如果聽日都仲唔退燒，要番去再見醫生做其他檢查睇下咩事

媽咪仲可以做啲咩幫你快啲好番？仔女病左，做父母嘅希望可以替你承擔。

第5日星期三，琴晚已經開始退燒，到今朝都無。發現背部有少少紅點，肚腩仔都有，但唔肯定係乾燥少紅定出疹。網上見嘅疹係紅到好誇張。所以唔敢肯定住，雖然個心知道退燒超過6個鐘，已安心左一半。不過心情認真麻麻，扭到爆旋陀螺咁，唔係呢樣唔嗰樣。咁岩佢又戒緊啜手指，可能都關關地事點解咁炆爭! 中午紅色疹開始明顯，但唔係話又紅又密。應該確認係玫瑰疹。老人家話用金銀花煲水浸身，希望清下濕熱，止痕退紅。唔好食海鮮蝦蟹等。

第6日星期四，紅疹再明顯多左，今日用芫茜水浸身，心怡覺得好香，仲想話飲啖…哈哈哈!! 扭計扭爆左，今晚忍心故事忽視佢，等大家都冷靜左先講野!! 佢喊到聲都沙埋，佢成年加埋嘅扭計時間都唔夠呢2日加埋嘅總和!!!!! 結果喊到飯無食, 攰到訓左! 心痛又無奈!! 明明個月買嘅新睡褲，今個月已經唔短左!! 燒一燒唔通高左!!