【每天成長一點點 BB終於成功戒啜手指】

By Mimi JW on 24 Dec 2018

我叫Joey Wong，係上班族媽咪，亦係一位緊張大師嘅新手媽媽。育有1女兒心怡，現齡11個月。閒時鐘意爬文睇育兒分享，鐘意試新野，好物實評，傾訴湊仔心聲，同一班媽媽一齊加油。初為人母，想好好紀錄囡囡嘅成長，分享做媽咪嘅心得。

心怡由4個月左右開始睡前啜手指，日間時間佢唔會啜，只會在攰到想訓嘅moment先啜左手，按撫自己冷靜落嚟。直到現在20個月，歷時近16個月，佢細個D嘅時候都認同啜手指係可以對佢身心有好嘅發展。

啜手指黎講，我主要擔心係影響到牙齒生長同手指變形，所以有SET左個時間俾自己同心怡，就係2歲前後就要盡戒。盡管旁人的不理解 (不停咁問點解俾佢啜？俾佢啜奶嘴啦，奶嘴好d！點解唔戒？強逼唔好俾佢啜啦！)，相信他朝有日時機一到都會成功戒到，只係遲早嘅事姐。

喺佢歲半咁上下，其實佢門牙同旁邊2隻都出晒，但係排位係前後腳咁，好似有大半隻收埋左喺門牙後面。另外佢隻手指已經咬到起”枕”，指甲有少少壓扁。差唔多時候開始慢慢試用唔同方法協助佢嘗試戒啜，方法有軟有硬，包括真係俾個奶嘴佢啜，但個衰豬咬咬下會成個放晒入口當食物咁玩；嘗試講故事方法洗佢腦；畫公仔落佢手指公，話係DADDY黎架, 唔可以咬佢之類；後來買左支聞說好WORK 嘅超苦手指膏，再配合埋用蟲蟲鐘意聞口水味會咬佢手指後變苦，佢有一刻係唔敢啜，但之後勇於挑戰去啜，食到苦味話「苦苦」，忍左陣唔啜。我仲妄想以為咁就成功？最後頂唔緊克服埋苦味啜番！亦有試過強行掹走佢隻寶貝手指同埋拉住佢隻手唔俾佢啜，慘過鬧佢！諗諗下，其實我地都習慣左佢俾嘅呢種Signal，同埋佢只係想訓先啜手，快速冷靜到自己，培養覺豬。所以…半佛系咁等緣份到!!