【第一次跟嫲嫲上學去 新手爸媽學習放心多少少】

今日第1次嫲嫲單拖湊心怡番學放學，出門前不停同心怡洗腦陣間要拖住嫲嫲，嫲嫲同囡囡番學，過馬路要抱住等… 依家諗番起都覺得自己可以試下放心多少少！

從未試過俾嫲嫲帶心怡單獨出街，因為嫲嫲湊仔經驗有限，所以有各種嘅擔心同因素。上星期去完泰國旅行後，幾日都有試過等嫲嫲拖住心怡行商場，見到嫲嫲都ok嘅。佢會見到心怡有咩唔對路扭就一野抱起佢。

遲早都要學識放手，或者我應該都要慢慢放鬆啲，今日咁岩爸b同我都要番工，就試下啦！送到心怡佢地落樓之後，心怡拖住嫲嫲回頭望我，叫媽咪呢，嗰下真係有唔捨得同覺得對佢唔住咁，望住佢地嘅背影唔捨得離開，有啲覺得自己似痴漢
深呼吸一啖… 好！去學校報名先！

望鐘10點，應該入左班房喇掛，忍住唔打電話俾嫲嫲住，過多幾個字終於聽到嫲嫲電話，話抱住心怡行多，仲搭多個輕鐵站，唔駛行咁耐。心怡見到學校門口有啲呆豬，入班房前喊左2聲，可能無番成個星期，突然唔習慣，但係有老師喺度都安心，因為通常有辦法按撫到佢，同埋衰妹見到同學仔玩，佢會好快冷靜同投入！

放學接送時間，原來爸b都好緊張嫲嫲第1次情況打電話了解，知道順利平安番到屋企同準備食lunch，太感恩！今日總算順利平安！

我都明嘅，如果有我地2個喺度，嫲嫲好多時都會無咁叻豬，可能有壓力，哈哈！但見到佢無咁精伶湊心怡，都梗有啲擔心架！

呢個係一個好好嘅經驗同學習放手嘅感受，相信心怡愈大我地嘅緊張亦會少啲少啲再少啲，所以要好好紀錄依家新手爸媽呢種痴漢緊張！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Mimi JW

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！