【我的母乳里程碑 幾次一路泵住奶一路喊】

由西瓜妹出世之後，一直緊持母乳餵哺！踏入6個月，我開始愈泵愈少奶，盡量埋身。伴隨住好多因素，我知道就快要完結呢個一路以黎最深刻最難捱最緊密最甜美既人奶路。所以，我影左母乳相 去記錄一下我同西瓜妹親蜜既時刻！

記得一開始成日都泵爆樽..無稔過到依定想半滿都難~試過好幾次一路泵住奶一路喊，當身邊既人質疑甚至係反對我餵人奶，唔太多人支持我同睇死我，呢6個月，我一路同自己講一日啦，比我餵多一日啦...我個人性格係所有事都可以盡量妥協配合，但當我堅持餵人奶既時候，我係前所未有咁企硬，就算所有反對聲音幾難聽幾令我難受，我只係可以對住個泵喊，因為我唔想比人多一個機會一個借口去阻止我餵人奶！每次西瓜妹飽個滿足樣，係我最大既動力，我相信呢個畫面，係所有母乳媽媽最引以為豪既地方，原來d奶係夠佢飲夠佢飽。

成為媽媽之後先知，母乳餵哺唔係你話想餵就一定餵到，同埋唔係你一句心中富有就會有奶(其實我知呢句說話，可能安慰鼓勵好有用)，好多謝mary加我入fb母乳群同創辦左上奶wtsapp group，比我地呢班乜都唔識既媽媽，入到去先知真係好多門學問，同令我感到我並唔係孤身作戰~道先塞奶時，凍敷會止痛但會退奶，熱敷就會通乳但要配合推乳先可以解決到問題..如果塞奶，仲有另一個方法-食卵磷脂/通乳寶，但聽說通乳寶好難食，卵磷脂又勁大粒，追奶就要比bb啜多d，如果泵就要回復番頭幾個月3個鐘就要泵一次，仲有深夜時間power pumping，就算無奶出都要繼續，因為要比身體知道要造多d奶！好感恩有幾位媽媽，無私地將自己既經驗同知識不厭其煩咁教我地，同耐心地解答我地既問題。

埋身-一開始好大機會會乳頭損,但bb唔肯用樽既一定要埋身 乳頭既傷口係不停重複結焦 而且需要一段時間適應再痊癒 係2個月後身體適應左 先無再痛,仲有你會得番好少私人時間 。
泵奶-喇叭唔岩size同d part有任何損毀泵唔清奶 或者隔太長時間無泵,好彩既就塞奶~係阿無睇錯塞奶真係叫做好彩,因為比塞奶更痛苦係收奶。同埋無止境咁洗樽洗泵(信我一定要買有烘乾功能既消毒機 真係方便好多)
飲食方面又係好多限制,收奶定上奶野好睇個人..講下我試過一般坊間所講既上奶野，3個唔同牌子上奶茶,通草煲湯,炒黑豆焗水,陳皮炒白米,陳皮黑豆炒三色米,木瓜魚湯,珍珠奶茶,豆漿,荳奶,白飯,每日3L水,王不留行中藥....全部對我都無上奶作用。

除左開始無奶,身體都開始話我知我需要調理下身體,因為依家泵完頭暈次數開始頻密 本身自己血氣不足 坐月期間我早午晚自己凑 除左12朝前唔凖洗頭之外 基本上要等家人凌晨番黎我先可以真正休息,另外本身貧血加低血壓關係 其實最好進補/食番一d補血食物 但大部分食完會收奶 同埋我個人虛不受補 飲完當歸湯都頭痛2日,所以我唔肯食(我係呢方面企到好硬 令到我媽媽心痛我咁先係咁叫我停餵人奶)

好啦 距離2019年仲有10日。到時掛唔掛泵 到時再稔~就算掛泵 都會繼續埋身,直到無奶先算！
呢次呢輯相真係好平 而且只係$5xx,我加多少少錢轉做mary影~超中意!(佢成日做快閃優惠 有開wtsapp group,如果你地有興趣 真係可以考慮下 因為效果好靚)

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：西瓜媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！