【兩胎媽媽紮肚經驗真分享 無出街紮足22個鐘】

不知不覺樂少已經3個月，悠媽亦回歸職場接近1個月，未生樂少前心想一仔一女完滿收工，於是計劃坐月後立即紮肚，想盡快搵返自己條腰嘛...

比較了坊間多間提供紮肚服務的美容院，動輒都要過萬元，雖則我係好想搵返條腰，但都唔係好捨得，好彩媽媽谷分享了紮肚師Cathy私人上門接單，以超過7折價錢就可以紮肚10日，仲包埋暖宮＋運動教學，就等悠媽姑且一試!

紮肚日決定完成咗悠悠4歲生日會後先開始，因為Cathy話如果紮完出街天氣熱會辛苦，同埋紮完最好唔好拆，直到第二朝佢上嚟前沖涼先好拆，效果會更好，果10日我無限次想半夜拆，但師奶心態比咗錢當然想得到最好效果，所以死頂無拆到！另外紮肚果幾日我都盡量唔出街，除咗中間有一日要同悠姐去迪士尼停咗一日，其他日子都無出街紮足22個鐘。

紮肚10天後等我分享下成果先：
- 有B前腰圍: 約24-25吋 (視乎有無食好野)
- 有B後腰圍: 39週42吋
- 生B後1個月: 32吋
- 10天紮肚療程後: 26.5吋
- 而家: 依然維持26吋左右，又係視乎有無食大餐，不過餵母乳都真係幫助不少，起碼唔會肥先，點樣會多奶，我又遲D分享先!

感覺:
- 紮肚係辛苦的！但又唔係想像中咁辛苦，尤其通淋巴的按摩真的不是流的

過程:
紮肚師會先幫你按摩通淋巴，我揀咗只集中瘦腰，所以紮肚師都只係針對條腰狂按，認真來說真係好鬼痛，紮肚師話因為拕B果40星期真係無郁過條腰，D淋巴好多都已經塞哂，所以按先會咁痛，果然按多幾日又真係無咁痛，證明淋巴真係通了不少，不過痛完再紮，信我！第二日你一定會見到效果，你會見到自己條腰越來越有返個線條，我自己呢就Call機位瘦得好快~

另外Cathy仲送咗個草球比我暖宮，天氣凍凍地放响肚上面真係好舒服的，我同佢講想瘦手臂同KEEP瘦肚，佢就教我做D拉筋的運動，好簡單的，只要日日有恆心做就會見到效果，不過2胎的我真係無乜時間跟足，係沖涼時有拉下筋，手又好似真係無咁腫喎。

提提大家：紮肚是塑身不是瘦身，佢係有助你修返個型，但要有肌肉要FIRM，要KEEP到，紮完了還是要努力做運動的，所以悠媽下個月都會開始返地獄TRx，到時再分享~

圖一：悠媽大肚照
圖二：紮肚前後對比圖

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text：Kamen

Photos：Kamen & Shutterstock

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！