天水圍天富苑媽媽抱B危站40樓簷篷 男嬰只有2個月大

天水圍天富苑有27歲嘅媽媽因產後抑鬱，抱住2個月大嘅囝囝爬出40樓嘅窗外危站簷篷。據了解，涉事媽媽同家人相處融洽，但喺湊BB方面受到困擾，情緒低落。

事件擾攘接近4個多小時，大概喺中午時分，警方接報有一名女子抱住數月大男BB，爬出窗外危站簷篷，其後救援人員趕到現場，有女警隔窗同涉事媽媽傾偈，嘗試紓緩媽媽情緒，但勤喻無效。

媽媽抱住BB喺窗外不斷徘徊，一時半身企出簷篷同轉身坐，更試過單手扶繩另一手抱嬰，沿住簷篷行到另一邊危坐冷氣機頂，其間更嘗試爬落下一層。至於媽媽手上嘅BB就一直無任何動作同喊。

警察談判小組指，8位談判專家與涉事媽媽談判超過2個鐘，發現媽媽主要因為係湊BB問題上有困擾，導致情緒低落。專家嘗試開導媽媽，並以「過來人」分享湊BB經歷，嘗試令媽媽覺得唔會只有自己先會有湊BB問題，又鼓勵媽媽，指到時成功湊大BB會有好大滿足感「將來同BB一齊嘅經歷會好開心。」

媽媽其後被打動，主動返屋內，其間媽媽一直手抱BB，進入屋內嘅時候消防員立即協助媽媽返屋內。 另外警察指，媽媽同屋企人相處融洽，並唔係獨力照顧BB，事發嘅時候屋企人亦在場陪伴，BB就有少少發燒，其後亦送院治理。

Text：Mami Editorial

Photos：Shutterstock