農夫陸永隔空召喚老婆佩服老婆湊女湊到咁掂

By race.cheng on 20 Dec 2018

有時做媽媽想唔湊小朋友出去鬆一鬆，其實係一件好難嘅事。成功得到允許出國，都要事前為小朋友準備一大堆嘢。今次陸永嘅老婆都唔例外，但係要老公湊掂兩個囡囡好似真係有點為難，搞到陸永幾乎每日都要喺社交網站歌頌老婆，問點解可以咁勁。

36歲陸永同28歲嘅老婆Reina已經結婚7年，有兩個囡囡。前排大囡學校聖誕Party，每個小朋友都要準備食物帶返去，但又唔可以喺街買啲薯片或其他零食，老婆又唔係屋企，囡囡又驚要帶陸永煮嘅嘢返學校，真係諗爆頭唔知點算。原來老婆一早準備定，係臨飛前準備定錫紙盤，叫老公去買魚蛋燒賣，陸永都大笑方法夠勁！仲話連個囡都贊成依個方法，話好采唔洗帶爸爸整嘅嘢！

做湊仔公真係唔易，仲要湊住兩個唔同年紀嘅小朋友。陸永話送兩個女返學放學真係好辛苦，一個要晨咁早就要起身，另一個仲返緊下晝班，一個返東面，一個返西邊，嘆氣只係試第二日，經已諗唔明老婆係「如何做到嘅呢？」仲話其實老婆只係出國走咗兩日，已經好掛住老婆。

湊囡又點知接送咁簡單，陸永兩個囡一直對自己服裝要求好高。但生女果然知道女心肝，而且都怕老公襯出嚟會失禮，所以老婆又準備晒囡囡每個活動嘅衫，一套套擺好，陸永話，幫個囡換衫個陣真係好驚老婆無準備，事關佢試過幫囡囡襯衫，然後俾人評價為大媽過啲大媽。但係另一邊廂，老婆見到囡囡咁著就話：「想問下香港今日咩溫度？點解可以著咁多保暖衫上身？」睇嚟陸永依個爸爸真係要慢慢學喇。