好唔好生多個小朋友？5個有手足嘅好處

有咗第一個小朋友之後，有新手父母會被湊BB嘅辛酸嚇怕，覺得一個就夠晒數；但亦有父母會懷念BB嘅可愛時光，想重新經歷一次，或為本身嘅小朋友增添一個可以一齊玩、一齊成長嘅手足。究竟家庭多一個小成員有咩好處？

1. 一齊玩

小朋友精力無窮，就算父母幾年輕都好，同小朋友放電嘅時候，都難免會感到精疲力竭。但如果有多一個小朋友嘅話，兩個小朋友就可以一齊大玩特玩，即使去爸爸媽媽冇咩興趣嘅主題樂園，都起碼有玩伴可以一齊笑、一齊玩、有共同嘅話題，絕對會開心好多！

2. 互相模仿

有兄弟姊妹作為模仿同學習嘅對象，會令小朋友喺學習各方面都會學得更快，如知道做咩行為會被讚賞同責罰等，有兄弟姊妹做正反面教材。

3. 學會分享

玩具、衣服、零食等唔再僅僅係自己一個人享用，有時或者會出現兄弟姊妹你爭我奪嘅情況，但有時未必係壞事，即使係爭搶，亦可以從中學習珍惜；而分享就可以享受到一齊玩嘅樂趣更多。

4. 互相照顧

喺爸爸媽媽唔得閒嘅時候，兄弟姊妹都可以互相照應，如年長嘅小朋友可以幫手餵年幼嘅小朋友食嘢，減省媽媽嘅工作。

5. 互相安慰

有時小朋友做錯事唔敢話畀父母聽，或被父母責備完之後，會感到悶悶不樂，呢個時候有一個手足願意默默遞紙巾同聆聽，可以令小朋友嘅情緒得到宣泄。

Text: Mami Editorial

Photo Source: Pinterest