4歲女童遭「契媽」虐待 親友收到10分鐘虐待片段

旺角4歲女童遭照顧者虐待案提堂，庭內播放一段女童受虐嘅片段，發現女童受虐過程令人髮指，喺片段中2名被告不斷指罵及恐嚇女童，其後更大力擺動女童數次。

女童喺呈堂嘅10分鐘片段中被一個銀色大鐵夾夾住鼻，不斷講「掟出街」一類嘅字眼，但女童一直被人要求要完整句子讀出，片段中有把聲對女童喝罵：「醒醒定定，唔記得就叫契媽講多次」，然後又要求女童要站起深呼吸，但又被指「唔係叫你用鼻呀，用個口呀」。

女童之後喊住要求對方再講多次（女童喺片段中稱對方為契媽），惟有人話「如果你再講大話，就塞你落垃圾桶，掟你出街」，另一人就不斷催促女童照句子再講一次，但女童一直做唔到。對方就大聲呼喝「拎你個屎坑腦出嚟記住呀」、「睇你死人樣，特登唔講」、「講咗咁多次，都記唔到，即係唔專心啦」，又警告如果再講唔出「你同佢自己跳入垃圾桶，我掟你出街」，仲恐嚇女童會將影片上載到社交網站「周圍畀人睇」等。

女童不斷哭泣同道歎：「對唔住契媽。」但有人又拍打女童鼻上嘅夾，要求女童「放鬆」舉起雙手，仲捉著女童嘅衫領不斷搖晃。

片段中有時近鏡影到女童嘅臉有瘀傷。至尾段，有人終放放開女童鼻上嘅夾，仲話：「夾到個鼻高左。」另一人回應：「靚啲囉。」

辯方庭上確認，片段中兩把聲音均屬兩名被告，但未有明確指出首次被告屬於邊一把聲音。

據了解，片段係由女童媽媽另一名朋友發現。事件被揭發後，媽媽嘅朋友突然收到一封附有記憶卡嘅信件，卡內載有一段長約10分鐘嘅女童受虐影片，現今成為呈堂證供。

受虐女童有一個妹妹，以前曾住兒童之家，媽媽出獄後獲跟返媽媽一齊住，但居無定所。上月媽媽就將兩女請「契媽」照顧。其後媽媽先接回細女，上周五接大女時發現囡囡面部及頭部多處瘀傷，已陷半昏迷，懷疑曾遭火燒、煙灼、搖晃及毆打，所以報警。現時女童情況不樂觀，有腦出血，血塊未完全清除，腦腫情況或會影響智力。

Text：Mami Editorial

Photos：Shutterstock