雙職媽媽4個難言之苦

每一個父母都希望可以見證子女唔同嘅成長階段，尤其係媽媽，更加不願意同自己十月懷胎嘅骨肉分開。

無奈現實中總有太多因素同顧慮影響，致令到有在職媽媽出現。有人以為在職媽媽相比全職媽媽更輕鬆，但在職媽媽嘅另一個名叫雙職媽媽，佢地所承受嘅壓力、悲哀其實唔會比人少，甚至有雙倍嘅壓力。

1.個腦全部都關於BB
雖然工作忙，但一有空閒就會打開手機相簿回顧下子女嘅相、片段。如果屋企有安裝攝錄機，更會長期打開攝錄機觀察BB係屋企嘅一舉一動，仲要快手食飯，務求爭取少少時間同BB傾一陣視像通話。如果係請保姆、工人姐姐照顧BB，又會多一份擔心，擔心BB冇得到妥善嘅照顧。相比全職媽媽可以見證住BB每日嘅成長，在職媽媽嘅顧慮其實係更加多。

2.工作長，工作量多，壓力更多
可能公司嘅工作做完，但返到屋企仲有一份正職等住你。而且開始時間將會係踏入家門嘅一刻直至第二日離開家門一刻為止。基本上是無做完嘅一刻，返工務求要準時收工返屋企接更，如果公司嘅工作未做完又要加班，無形間嘅壓力又更大。即使效率高可以準時走，如果回程途中遇著塞車，落車更要爭分奪秒咁急急腳返屋企。

3.零私人時間
返工歸返工，收工歸仔女。打算約下朋友去行街食飯，簡直係可以列做短期目標。尤其係餵人奶嘅媽媽，要定時定候餵奶，如果唔係就好易塞奶。即使唔洗埋身，要去街都要帶住奶泵、冰種等配件。仲要搵地方要搵埋附近有冇育嬰室方便泵奶。當諗到呢層，去街嘅意慾會即時降至零。就算唔需要餵奶，當BB發現你唔係平時返屋企嘅時間返到去，佢地就會不停扭計要搵你，往往呢個時候就會收到電話通緝你盡快返屋企。

4.與外界脫節
有人話全職湊BB先會同外界脫節，但其實雙職媽媽返工還返工，放工返屋企湊BB。莫講話有機會睇下電視，你返到屋企係連食飯、去廁所嘅時間都係一種奢侈。即使有時間，你都會想留黎同BB相處。到BB訓左，攰到貼地嘅你都會寧願選擇訓覺補眠好過，所以又點會有時間接觸到外界嘅資訊。

Text：Mami Editorial