【開9度再開刀 生仔歷程記錄篇】

事隔一年多，終於都的起心肝記錄番生仔歷程喇~

(P.S. 濃縮版但都好長)

穿水+陣痛

凌晨2點幾，訓訓下感覺到下面有D野流出嚟，即刻去廁所睇下咩事，底底濕咗一大撻但唔係血，應該就係傳說中嘅穿水!! 嗰一刻又緊張又興奮，好快就同baby見面喇!!

冇幾耐就開始感覺到有D好似M痛嘅感覺，即刻拎部電話出黎用App記錄住痛嘅密度，同埋叫醒老公去醫院~

待產

去到醫院，搞好哂入院手續同檢查，姑娘就黎講解下住院程序同埋問定BB會食咩牌子奶粉等等。因為老公跌斷咗隻腳要坐著輪椅，所以姑娘好好咁安排咗近門口張床俾我，等老公可以坐喺輪椅陪我。

當時只係開咗1度，果時嘅痛係仲可以忍受嘅，老公仲同我喺到望住個監察器嘅指數上上落落。過咗一陣開始痛嘅密度又快咗，又再痛D，第二次姑娘再嚟檢查嘅時候已經開咗2度，姑娘仲話子宮好靚，唔明點解但我估係度數開得快。之後醫生就嚟到，但發現BB心跳比正常低，而且我又完全feel唔到胎動，所以醫生建議睇多一陣，如果都係冇好D，就要開刀。

隔咗冇幾耐就開始覺得越嚟越痛，姑娘再檢查嘅時候已經開咗3度，佢問我有冇急大便嘅感覺，當時都係未有，但過一陣就嚟料，開始勁痛勁急，我開始救求，同姑娘要求打止痛，但姑娘唔建議，因為BB心跳偏低而且又唔郁，驚打完止痛BB會更加唔郁。之後姑娘突然間拎哂針過嚟話要幫我打催生，但我已經痛到攬住張床…所以就決定唔催生，速戰速決，直接開刀!!!

準備開刀

老公幫我搞好哂文件，姑娘就幫我安排手術室，但要等到9:15，聽到要等半個鐘之後真係好想喊，嗰時已經痛到1分鐘都唔想等，好想即刻拎個BB出黎…

過咗唔知幾耐，老公就俾姑娘推咗唔知去邊，然後另外一個姑娘就嚟叫我紮辮準備去開刀，其實已經痛到完全紮唔到辮，最後紮完等於冇紮…之後姑娘就推我去手術室，雖然沿途都有吸住笑氣，但實在太痛我不斷咁撐，醫院嘅姐姐好好咁捉住我隻手同我傾計分散我注意力，同埋叫我唔好再撐張被如果唔係就走光…

去到手術室門口等，因為我狂吸笑氣，姑娘忍唔住走嚟同我講「太太你係咪好痛？ 如果唔係好痛就唔好係咁吸，如果唔係你會暈架..」其實我都已經痛到feel唔到係咪止緊痛，朦朧間就扔走咗個笑氣罩，同埋記得有大嗌過好痛~

開刀之前醫生再同我做檢查，然後發現已經開到9度!!!!!!! 唔怪得咁痛啦=.= 醫生問我「你番唔番上去等？」我問醫生要等幾耐，佢話「唔知，答你唔到」所以我都係決定開刀…一黎好痛，二黎又怕BB心跳唔穩定，想盡快拎BB出黎~

麻醉+開刀

入到手術室，麻醉師已經standby，佢叫我彎曲身唔好郁，會有D痛但千祈唔好郁，當時有2個姐姐攬住我等我唔好郁，但因為陣痛實在太痛，唔小心郁咗D，所以又要再拮多次…不過相比起陣痛，其實唔係好痛，打完之後藥力好快就見效，嗰一刻就好似死過番生咁，即刻鬆哂~ 之後就見到姑娘推我老公入嚟手術室，有D經歷生死再重遇嘅感覺…hahaa

醫生問媽媽點呀？麻醉師話冇事啦，有番笑容，我心諗頭先真係失禮哂Lol…手術過程好快，醫生將及及拎出嚟嘅時候，感覺到肚皮被拉扯，只係十分鐘到及及就出咗世，之後姑娘幫及及清潔，一抱及及過嚟放喺我側邊佢就唔喊，真係好神奇，感覺到及及暖暖嘅體溫，好感動呢~

就係咁，我半個鐘由3度開到9度，然後開刀，經歷咗人生最漫長嘅短短7小時。雖然有人覺得好唔抵，開到9度痛咗咁耐先開刀，但我冇後悔過選擇開刀，對我黎講最緊要都係BB可以平安出世~

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：j_and_mama

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！