估唔到為咗BB 三分鐘熱度嘅自己可以堅持到呢三件事

做女嘅時候，凡事都係三分鐘熱度，做咩都會好易半途而廢，冇恆心堅持落去；但當做咗媽媽之後，喺愛同責任感嘅驅使之下，竟然可以不辭勞苦、日復日咁堅持做呢三件事，連媽媽都會驚訝自己竟然有咁嘅毅力。

1. 餵母乳

無論係埋身媽定係泵媽，都深明餵母乳嘅痛處同難處，如生理上嘅痛苦：塞奶、脹奶、手麻；又甚或係心理上嘅壓力：奶量下跌、夠鐘要餵奶／泵奶排清乳汁、出外冇地方哺乳、公司同事唔體諒等。種種因素都會令媽媽身心俱疲，會好想放棄。但一諗到母乳係BB最好嘅食糧，為BB健康著想，媽媽都會堅持落去。

三個月、半年、一年⋯⋯每次訂一個目標限期鼓勵自己去完成，當自己成功餵母乳到三個月後，暗自佩服自己嘅毅力之餘，又唔捨得停止同BB嘅呢段親密餵奶時光，又會再咬緊牙關緊持落去，訂一個新嘅限期，當突破一個又一個目標，成功光榮掛泵嘅人奶媽都會感到非常自豪，覺得自己完成咗一件人生嘅創舉。

2. 每日同BB影相

好多媽媽都希望幫仔女做一份成長紀錄，由BB出世第一日起，每日都會為BB影相，紀錄低BB每日嘅變化同進步，如：第一次打呵欠、第一次微笑、第一次自己拎奶樽、第一次翻身等⋯⋯每次睇返BB嘅呢啲相或片段，總能夠令爸爸媽媽回味無窮。正因如此，媽媽更願意堅持每日都隨時捕捉BB嘅新表情或有趣時刻，等到將來BB大個咗，將呢啲事情都一一遺忘後，媽媽可以同佢再重溫返呢啲成長時刻。

3. 細心做好BB每一件事

媽媽做女嗰陣未必怕對自己咁細心，但對著BB簡直係捧喺手心呵護備至，每日重復不斷為BB餵奶、掃風、換片、沖涼、洗臉、搽cream、按摩⋯⋯都絕無怨言，更會深怕令BB唔舒服或做得唔夠好。每日幾乎將所有時間都用喺BB身上，連自己都會驚嘆自己對BB竟然咁有耐性！

雖然好多人會話媽媽係應份對仔女好，但願意犧牲自己嘅時間，付出無限關愛同耐性畀BB，並唔係每個媽媽都做得到，如果媽媽自問係一個三分鐘熱度嘅人，但都甘願為BB做到上述其中一件事，其實都係好叻、好值得欣賞嘅媽媽！

Text: Mami Editorial