產後媽媽容易出現嘅4大生理煩惱

孕媽咪懷胎十月最想就係卸貨，但卸貨後究竟係更輕鬆定更辛苦？

BB嘅誕生意味住媽媽忙碌嘅生活正式開始，媽媽除左要照顧BB日常起居之外，仲要處理屋企雜務，另一方面更可能要兼顧工作。但原來除左生活上嘅煩惱，產後媽媽都好容易會面對以下四種生理上嘅煩惱。

1.脫髮

35-45%嘅媽媽都有產後脫髮嘅問題，因為孕媽咪體內嘅雌激素改變，令媽媽懷孕期間頭髮生得比平時快，仲更有光澤。但當產後雌激素回復正常嘅時候，大約產後幾個月開始頭髮就會慢慢衰落。雖然話幾個月內就會逐漸減少脫髮，但係呢段期間，洗頭、吹頭個時會一束束咁脫落不在話下。就連平時嘅一舉手一投足，頭髮都會輕輕咁落下，發生係食飯、做嘢個時都幾尷尬。

2.記性變差

懷孕期嘅荷爾蒙分泌改變，會令媽媽嘅血清素同多巴胺不足、或甲狀腺功能低下，而呢啲因素都會影響到媽媽嘅記性變差。再加上媽媽產後要顧嘅嘢多左、壓力又變得大左，無形間令到自身嘅專注力變弱，最後就變到咩都唔記得，仲會比身邊朋友話一孕傻三年添啊！

3.經期亂、血量不穩

一般媽媽都會係產後6-8星期後恢復經期，有啲媽媽可能會早係4星期就恢復月經，而餵母乳嘅媽媽亦會因為哺乳影響而延遲出現月經。除左產後第一次月經嘅報到時間預測唔到之外，產後嘅月經係會同產前嘅狀況好唔同。以往媽媽嘅經期可能係固定28日一次，每次為期7日，但產後經期頻率會變得紊亂、為期較長、血量亦會時多時少。呢個情況大約要維持到第三個週期之後先會逐漸好轉，對於有經痛嘅媽媽而言，簡直係苦上加苦！

4.便秘

便秘係產後媽媽常見嘅病之一，因為懷孕令媽媽嘅腹壁變闊，產後容易變得鬆弛、無力。加上產後腸胃功能變弱、腸嘅蠕動慢左令到便便變硬，媽媽去廁所時就會變得辛苦、甚至流血。另外，如果媽媽係懷孕期間曾經生過痔瘡，產後生痔瘡嘅機會仲會更加大添！本身湊住BB已經無時間去廁所，而家咁樣就算有時間都解決唔到啊。

Text: Mami Editorial