被忽略比處罰更痛苦 孩子求父母關注嘅4個行為

爸爸媽媽有冇試過，孩子平時明明有能力做某啲行為，如：可以自行打開門、打開食物盒或著鞋，但孩子會突然表示自己做唔到，要求父母幫手呢？有心理學家指出，當孩子感到被忽略嘅時候，就會希望透過一啲行為引起爸爸媽媽媽嘅注意，令自己重新獲得關照同重視，以下4種都係孩子常見嘅求關注行為。

1.向父母炫耀討讚賞

當自己成功做到某啲行為，會第一時間展示畀父母睇，希望得到父母嘅讚賞，當得到父母大力讚賞同鼓勵、笑著回應小朋友嘅時候，小朋友就會笑得好開心，會更落力去表現得更好，非常可愛！呢種係小朋友非常正面、積極嘅求關注方式，父母亦會好樂意去給予小朋友回應。

2.故意做父母唔鍾意嘅事

有啲小朋友會覺得做成功嘅行為只會得到父母冷淡嘅回應，反而做父母唔鍾意嘅行為，父母先會關注自己更多，於是就會循著「錯誤」嘅方向去討父母嘅關注，呢個情況常見於家中有其他較優秀兄弟姊妹嘅小朋友。因為就算小朋友做得幾好，父母都會將小朋友同其他手足比較，覺得小朋友唔及其他手足優秀而欠缺讚賞，令小朋友決定用「曳」去勝過其他人。

3.向父母告狀

有啲小朋友一爭玩具或見到兄弟姊妹做錯事，會立即向父母告狀，求父母介入。前者好多時係小朋友覺得父母會偏幫自己，所以向兄弟姊妹展示自己係較受寵愛嘅一方；後者就係向父母暴露兄弟姊妹唔及自己懂事。

4.向父母示弱

有時小朋友明明好多事都做得嚟，但當有父母在場，就會扮做唔到而請求父母幫手做。爸爸媽媽或者會感到奇怪：點解平時孩子識做嘅嘢忽然又會唔識做？ 其實小朋友都只係想父母抽時間喺陪自己身上。

小朋友嘅呢啲行為都係小朋友向父母暗示：「你太少關注我喇！」爸爸媽媽不妨都適時回應一下小朋友，同小朋友玩一陣啦！

Text: Mami Editorial