媽媽難得成功自然懷孕但懷孕20週囝囝被診斷左心臟發育不良

By race.cheng on 06 Dec 2018

英國男童Reggie未出世已被診斷患有HLHS，即左心臟發育不良，醫生指孩子出世後只有50%生存機會，甚至會喺幾小時內死亡。但慶幸爸爸媽媽冇放棄過Reggie，經過多次心臟手術後，Reggie成功活到現在，惟近日被醫生指出，因Reggie身體過度受損，再無法做手術，只有5分1機會活到5歲，隨時隨地會心臟驟停。

Reggie能夠嚟到依個世界絕對得來不易。37歲嘅Michelle同丈夫一齊6年，都無法懷孕，亦被醫生指懷孕唯一方法係體外授精。Michelle於是放棄，但有一次喺慶祝除夕後，Michelle身體不適入院，意外發現懷孕。

但喺Michelle懷孕22週嘅時候，醫生發現未出世嘅囝囝患有HLHS，但佢哋無辦法放棄囝囝，因為Michelle話「當時我確確實實感受到Reggie喺肚入面」。

Michelle係生產過程接近失咗2升血，但不幸之中嘅大幸係Reggie成功出世，更有9磅12安士重。可惜，Michelle兩公婆被告知Reggie只有50%生存機會，甚至會喺幾小時內死亡，暫時幫到Reggie延命方法係接受心臟手術。所以Reggie一出世就接受咗9個鐘手術，Michelle同時仍意識到會有最壞嘅情況發生。

幸運之神一直陪伴Reggie，Reggie成功戰勝死神，雖然未來會有好多未知數，但Michelle同老公無放棄過每一個Reggie有可能生存嘅機會，後來囝囝再接受第2次心臟手術。

每一次手術，Michelle一家都無藐視過任何一個幫Reggie生存嘅可能性，Michelle話「我已經問過上帝，當Reggie時間到了，我會走喺佢面前，幫助佢超越生命第二次旅程」。

Michelle充分珍惜同囝囝相處嘅每一秒，宜家Reggie已經兩歲零三個月，每六個月就需要接受一次心臟檢查，但不幸係最近醫生指Reggie身體已經開始損壞，唔太可能接受心臟移植，只有5分1機會活到5歲，隨時隨地會心臟驟停，但對於Michelle嚟講只要相信，囝囝都能夠活下去：「未來或者會出現新技術可以幫助囝囝」。