保護BB由家居做起 7個家居安全好物

爸爸媽媽緊係擔心自己仔女嘅安全，出街好似做保鏢咁帶住BB左閃右避。

但係屋企都千其唔好鬆懈啊，因為好多時意外就發生係屋企入面，可能係一個唔留神，BB就撞到、跌到或者夾到。

所以我地要由屋企方面做起，準備好一切家居安全嘅用品，咁BB要點玩、爬去邊都得啦！

1.門夾

尤其夏天，開住窗、風扇好容易吹到道門自己閂埋，用左唔洗驚小朋友嚇親，又可以防止BB錯手閂門夾到，亦唔怕小朋友反鎖自己。

2.門縫膠片

當BB開始學行個時，要扶住周圍嘅嘢行。萬一扶住左門縫，唔為意就好容易夾到手仔。

即使用左門夾，門縫都有機會摺到好埋，所以用埋就萬無一失啦！

3.防撞軟膠

一種只係包住角位；一種係長型，可以用係牆角度。

爸爸媽媽要盡可能為屋企每一隻角位都包上防撞膠，咁就可以比BB周圍摸、爬，比佢地探索多啲，對佢地嘅發育都好啲架。

4.櫃桶鎖

當BB開始大，會慢慢識得點樣開閂櫃桶，仲會將櫃桶入面嘅嘢同你倒哂出黎。

如果唔想執到傻嘅話，記得裝返個鎖喇。

不過千其唔好係BB面前裝同開，因為BB學嘢實在太快喇，好快就會跟住你咁開。

5.集線盒

BB好奇心強，越污糟、越危險嘅嘢，佢地就越有興趣。

萬一佢地手仔濕笠笠仲掂落啲電制度就危險喇，又或者佢地將啲電線當牙膠咁咬就大件事喇。

所以整理好啲電線係一個盒入面就唔驚吸引到BB玩啦。

6.圍欄

BB係遊戲墊玩親都會玩到出哂界，又唔想佢摸到地板，或者唔知佢爬左去邊，就要加上圍欄喇。

而家好多圍欄都設計到有唔同玩樂功能，可以確保BB係安全範圍內之餘又唔驚悶親佢啦。

7.床欄

有時行開行埋都會放BB係大人床度玩下，或者有時BB都會係大人床度小睡一下，驚佢醒左會周圍碌、碌落床，唔係就咁用幾個枕頭疊高就阻到佢地架，最安全起見當然係裝返個床欄，咁行開一陣都唔會心掛掛喇。

Text: Mami Editorial

Photo : Taobao