4句說話狠狠刺痛在職媽媽嘅心

如果可以嘅話，有邊個媽媽唔想有多啲時間陪住仔女長大、一齊經歷一生人只有一次嘅童年？但唔係個個媽媽都可以唔憂柴、唔憂米咁全職湊小朋友。為咗子女溫飽、過上好日子，媽媽都要出外打工賺錢，將仔女交畀親友或工人姐姐照顧。但當聽到以下4句旁人無心嘅說話，都會感到難過。

1. 掛住返工唔理啲仔女

講到好似媽媽故意返工而冇理過仔女咁！如果屋企經濟許可嘅話，媽媽又何嘗唔想抽多啲時間陪BB？好多在職媽媽返工以外嘅時間都係照顧緊仔女，就算返緊工都一樣會好掛心仔女嘅情況，有時會開CAM睇下BB，有時會開電話睇下BB嘅相，BB一預到咩狀況，媽媽都會立即請假帶BB睇醫生或照顧BB，每一刻都心繫BB。

2. 返工唔駛湊，你就爽啦

好多媽媽一放工都會即刻趕返屋企湊BB，親自接手返照顧仔女嘅一切工作，好似一日打兩份工咁，但呢句說話就將媽媽嘅付出抹殺，返工嘅媽媽唔代表唔駛湊仔女！

3. 啲仔女鍾意工人姐姐多過你

有邊個媽媽會希望仔女鍾意外人多過自己？但事實上自己返工，陪伴仔女嘅時間點都唔及工人姐姐嘅長，唯有喺放工同假日好好陪返仔女個夠，但呢句說話真係會狠狠刺痛媽媽嘅心。

4. 唔係你湊就梗係唔知啲仔女鍾意咩啦

呢句說話其實係質疑媽媽唔了解自己嘅小朋友，雖然媽媽每日對小朋友嘅時間相對較短，但只要呢段時間內，媽媽同小朋友都有一段優質嘅親子相處時間，同時透過家人／工人姐姐了解小朋友平日嘅習慣、動靜，媽媽都一樣會知道小朋友嘅喜好。

Text: Mami Editorial