前世情人同媽媽嘅3個差別待遇

好多人話囡囡係爸爸嘅前世情人，媽媽望住囡囡咁痴爸爸，爸爸又咁錫囡囡，成個畫面真係好溫馨呀～

雖然話囡囡痴爸爸多啲，扭計搵爸爸，相對媽媽就輕鬆啲。

但當你見到老公同囡囡相處得比自己更甜蜜、更旁若無人咁嘅時候，心裡就真係有啲不是味兒⋯⋯

唔知大家有冇發現老公對自己同囡囡有呢三個差別待遇呢？

1.花錢

就最實際、具體嘅金錢身上，以前可能只要一句「我想買⋯⋯」，老公就會二話不說就買比自己。

到囡囡出世後，同樣一句「我想買⋯⋯」，老公就會有唔同藉口，例如話「太貴、太無價值」等等；

但只要你係句子後加上比囡囡，「我想買⋯⋯比囡囡，老公可能連個樣嘢係咩都未清楚就話好、買。

2.花時間

以前老公只會花時間係自己身上，行下街、睇場戲，老公可以一心一意陪自己，覺得自己係最幸福嘅女人；

但囡囡出世後，一句「我想去⋯⋯/做⋯⋯」，老公雖然唔會一口拒絕，但會話「搵日去/做」，而呢個「搵日」會搵到老公都無左回事。

同樣只要話係同囡囡去，「我想同囡囡去⋯⋯/做⋯⋯」，老公就會話「呢個星期就去/某一日去」，係雀躍到比埋個實質日子你。

3.說話嘅語氣

以前老公對自己係溫柔備至，專注自己嘅一言一行，但自從囡囡出世後，你先發現自己老公原來有比以前更溫柔嘅語氣～

仲要有時自己大聲左少少講嘢，比老公叫返自己細聲啲添！

相比之下，老公以前嘅好，原來都未係最好了～

雖然有差別待遇，但一個係陪喺你身邊嘅人，一個係自己懷胎十月嘅親生骨肉，兩個同樣係自己愛嘅人。

其實又點會介意咁多~反而仲感恩老公咁愛錫大家嘅愛情結晶！

Text：Mami Editorial