貪靚媽媽為左BB要放棄嘅4件事

有邊個女人唔貪靚，啊媽都係女人，緊係貪靚架啦。

但靚係要付出代價，而偉大嘅媽媽係會為左BB嘅健康而放棄扮靚，相信呢個代價更加大。

靚靚嘅媽媽，你地係咪已經放棄左呢幾樣嘢？

1.放棄染髮

有BB之前可能會係頭髮上花啲心思，得閒換下顏色。

到知道陀住BB，又話孕婦唔可以染髮；到生完以為可以染，但染完髮個幾日，頭髮濕左水都有機會仲有染料未洗得乾淨。

就算洗乾淨，染髮劑嘅化學味至少留兩日，又無可能兩日唔接近BB。

所以就算見到自己個布甸頭，都只可以隻眼開隻眼閉。朋友們唔好再問我幾時搞搞個布甸頭喇！

2.放棄化妝

化妝可以修飾女人嘅一切，化完容光煥發、精神爽利，自信心都返哂黎。

做左媽媽要湊BB，成日無覺好訓又要擔心呢樣嗰樣，更加需要化妝品。

但樣樣化妝品都係化學嘢，化左上面又唔可以痴落BB啲皮膚度、搽左唇膏又唔可以錫BB！最後，媽媽們都放棄了⋯⋯

3.放棄造型

以前去街襯衫起碼要半個鐘，而家做左媽媽唔可以再叫襯衫，只可以叫換衫，因為你連襯衫嘅時間都冇啊！

就算有時間襯，都有好多限制。

要餵人奶嘅又唔可以著連身衫、緊身衫，要方便餵奶；要用揹帶嘅又只可以著啲平滑嘅衫，唔係就會刮到BB；手袋再唔可以用啲細細個，唔係就裝唔哂BB去街要用嘅嘢；

要方便湊BB，T-shirt、闊褲、大包包就係媽媽嘅最好選擇，所以你話有咩style 可言喎～

4.放棄香水

對於貪靚嘅女人黎講，香水就好似定妝噴霧咁。外表幾靚都好，都一定要噴埋香水先有完整性。

但有研究指出，孕婦、嬰幼兒不宜使用、接觸二手香，因為有機會引致嬰幼兒過敏、包括專注力同學習方面嘅發展遲緩。

而且香水會殘留係體內，無聲無息咁對人體造成傷害。你話：愛錫小朋友嘅媽媽，又點會唔放棄香水。

Text: Mami Editorial