生BB唔止媽媽努力 陪產爸爸可以做嘅5件事

雖然話生BB男人係幫唔到手，但爸爸入到產房陪產唔係繑埋雙手等BB出世，尤其係順產嘅媽媽可能已經歷咗好耐陣痛，真係受盡折磨，爸爸嘅角色好重要，要畀媽媽精神上嘅力量！以下5件事陪產爸爸有冇做？準備陪產嘅爸爸都要留意。

1. 要比媽媽冷靜

入到產房即係媽媽準備生得，爸爸可能聽到媽媽大喊大叫，甚至痛到嘔，無論面對媽媽任何狀態，爸爸記得保持鎮定。如果連爸爸都又驚又慌，媽媽會更擔心，更冇安全感。

2. 鼓勵說話唔少得

雖然爸爸唔可以代媽媽生BB，但面對住媽媽痛苦嘅樣，爸爸一定要畀多啲鼓勵媽媽：「加油呀，BB就嚟出世！」、「爭少少就得㗎喇！」即使冇咩實際幫助，媽媽聽到鼓勵都會振作一下。

3. 畀隻手媽媽捉住

爸爸最實際可以做嘅就係畀隻手媽媽捉住，要有心理準備媽媽激動起上嚟，可能會鍊或摵爸爸隻手，不過呢啲皮肉之苦點及媽媽生BB嘅痛，爸爸忍受下就好。

4. 唔好講無謂笑話

幽默嘅爸爸可能想講笑話等媽媽放鬆啲，但要知道媽媽面對緊生BB嘅十級痛楚，爸爸講嘅笑話佢完全笑唔出，又如果媽媽真係笑咗，可能影響咗佢生BB嘅呼吸節奏同用力。爸爸只要喺適當時候鼓勵幾句，安份做好陪產角色就夠。

5. 生完唔好只掛住BB 

媽媽千辛萬苦將BB生咗出嚟，爸爸千祈使唔好淨係掛住睇BB，要同時關心太太，睇下太太情況係咪可以，仲要感激呢個走過鬼門關咁勇敢幫你生BB嘅女人。

Text: Mami Editorial