生咗BB之後 媽媽甘心減少嘅5個時間

做咗媽媽之後，好多嘢都唔只諗自己，可以話事事以BB為先，考慮BB嘅需要。即使媽媽為咗湊BB少咗好多時間，其實唔係犧牲而係取捨，見到BB開心健康成長幾辛苦都值得。隨住BB嘅出現，媽媽少咗以下5個時間，不過親子時間有增無減。

1. 睡眠時間

媽媽嘅睡眠時間一定比以前少好多，幾耐未試過連續瞓超過6個鐘頭？湊初生BB半夜要起身餵奶，隔兩三個鐘就起身一次，BB出世頭幾個月肯定冇覺好瞓。即使BB大少少戒咗夜奶，佢都未必一覺瞓天光，媽媽亦唔放心，半夜起身睇吓BB瞓成點，基本上媽媽係跟住BB嘅作息時間走。

2. 自由時間

以前時間好彈性，自己安排就得，想做咩都冇問題。不過，媽媽依家嘅生活圍住BB轉，每日要先處理好BB嘅起居飲食，之後先得閒做自己嘢，其實忙完BB啲嘢都冇咩時間剩。想去旅行？唔似以前話去就去咁瀟灑，要諗吓係咪放低BB幾日，又係咪可以帶埋BB去。

3. 夫妻拍拖時間

由二人行到三人行，BB嘅來臨為屋企帶來好大變化，兩公婆要湊BB都冇時間拍拖，去到邊都要帶埋BB，唔知幾耐冇享受過二人世間，亦好耐冇拍拖睇戲。難得揾到親友幫手湊住BB，但掛住BB唔敢去咁耐街，匆匆食個飯就返屋企。

4. 見朋友時間

未有BB前可以成日約朋友行街睇戲食飯，依家要湊BB當然冇咁容易。如果要出街，就要同老公夾好時間由佢湊BB，或者帶埋BB一齊出去見吓朋友。娛樂時間係少咗，但媽媽都要取得平衡，間中同朋友見面抖吓。

5. 好好食一餐飯嘅時間

可唔可以安安落落食一餐飯取決於BB嘅狀態，媽媽好多時都係三扒兩撥食完飯就要去照顧BB，唔係就一邊抱住BB一邊食。如果咁啱BB瞓咗，媽媽終於可以好好食餐飯，但談不上享受，因為擔心BB好快瞓醒。

Text: Mami Editorial