小予恩病情逆轉 媽媽肝功能指數超標無法捐肝 仍幸獲有心人捐肝

患有膽管閉塞嘅小予恩病情傳來好消息，獲爸媽嘅朋友捐肝！原先小予恩嘅爸爸媽媽一直為肝移植前嘅檢查準備，希望自己能夠可以捐肝畀囡囡，但家人指，予恩媽媽可能太勞累，導致肝功能指數超標無法捐肝。

皇天不負有心人，幸好之後傳來好友願意捐肝嘅消息，朋友亦已經通過肝功能測試，如果之後可以通過其他身體檢查，就可以確定成為予恩嘅捐贈者！予恩家人就借社交網站，感謝朋友嘅無私付出。

現時小予恩肝膽指數穩定，腦受損部份比當初減少，視覺亦有明顯進步，已經慢慢增強活動身體嘅意識，瞓喺床嘅時候經常想自己起身，但小予恩仍然唔可以自行翻身同坐立，需要定期接受心光學訓練同針灸治療。

小予恩喺出世2個月後確診膽管閉塞，喺2016年接受肝腸吻合手術後，呼吸及心跳一度停止，病情惡化；當時家人指，是醫療失誤導致，但責任追究問題到現在仍未解決。

Text：Mami Editorial

Photos：小予恩關懷禱告組