新手媽媽由零開始 育兒路上最想感激嘅4個人

成為新手媽媽既喜亦憂，見到新生命嘅來臨充滿喜悅，同時亦擔心唔知自己湊唔湊得掂。冇人天生就識做媽媽，湊BB除咗要付出無窮嘅愛，仲要靠一點一滴嘅經驗累積。新手媽媽每日都學習緊點做好「媽媽」呢個角色，仲有以下幾個人陪住媽媽努力，媽媽好想多謝佢哋！

1. 老公

第一個感激嘅人一定係老公。BB出世後佢成為新手爸爸，同媽媽一齊由零開始去湊BB，一齊去經歷BB好多個第一次，佢都唔係天生就識做爸爸，但佢好努力去做好爸爸嘅責任。雖然有時兩公婆會因為湊BB嘅事而嗌交，但大家都係為BB好。爸爸係媽媽嘅最佳拍檔，亦係精神支柱，可以同佢分享湊BB嘅種種生活日常。

2. 爸爸媽媽 ／老爺奶奶

四大長老幫手湊BB，分擔咗媽媽唔少湊BB嘅工作同壓力，媽媽同老公先可以安心去工作，第二個感激嘅人當然唔少得自己嘅父母同老爺奶奶，佢哋絕對係媽媽強大嘅後盾。兩代湊BB嘅方法可能唔同，長輩們嘅湊BB經驗可以參考，佢哋縱孫亦係愛錫BB嘅表現，實在無可厚非，只要大家有共識，搵到最適合嘅相處方法就冇問題。

3. 身邊嘅媽媽朋友

身邊嘅媽媽朋友絕對畀到媽媽好大嘅支持，有經驗嘅媽媽朋友就好似活生生嘅育兒字典，媽媽有咩育兒問題都會向佢哋請教，例如揀咩奶粉、尿片，有過來人嘅意見，媽媽湊起BB上嚟都有信心。如果朋友都係新手媽媽，大家對BB每樣嘢都特別有共鳴，可以互相鼓勵。

4. 幫到手嘅外傭

雖然話外傭係受薪，做得好係應份，但有請姐姐嘅媽媽就知道，一個好嘅外傭姐姐難求！好多媽媽都分享請幾個姐姐都唔啱心水，如果遇到一個好嘅姐姐，可以幫到手湊BB、做家務、煮飯，真係幫輕媽媽好多。

Text: Mami Editorial

Photo Source: Pinterest