孕媽媽連瞓覺都唔舒服 孕期唔同階段嘅理想睡姿

隨著肚裡面嘅BB愈嚟愈大，媽媽喺瞓覺嘅時候會感到被BB壓住而瞓得唔舒服。但當想轉換姿勢時，又會擔心某啲姿勢會危害到BB而唔敢輕舉妄動。其實，喺孕期嘅唔同階段，某啲睡姿可以令孕媽媽瞓得舒服又唔會對BB造成不良影響㗎！

1.孕早期（1至3個月）

呢個時期嘅BB仲係非常細小，子宮尚未會對其他器官構成壓迫，加上媽媽仲未會感受到BB嘅重量，所以想點瞓都得，不過就要避免趴睡！

2. 孕中期（4至7個月）

孕媽媽嘅肚開始變大同凸出，所以瞓覺時應避免壓迫到個肚，如果瞓覺嗰陣冇覺得唔舒服，仍然可以選擇側卧或仰卧，而左側睡嘅姿勢，最能夠令孕媽媽感到舒服之餘，亦有利於血液循環，減少水腫發生。

3. 孕後期 （8至10個月）

孕媽媽嘅肚已經變得非常大，左側卧嘅睡姿可以減輕子宮對下腔靜脈嘅壓迫，令胎兒嘅血液同氧氣都可以得到充足供應。要注意嘅係，孕媽媽唔可以再用平躺嘅姿勢瞓覺，因為呢個姿勢會令子宮壓迫下腔靜脈，從而令孕媽媽出現頭暈、心慌同噁心等症狀。

好多孕媽媽都會反映一整晚都維持左側睡嘅姿勢，都會瞓得好唔舒服。其實左側睡雖然係最佳嘅睡姿，但係都唔代表孕媽媽要成晚保持同一個姿勢唔郁，間中都可以變換其他姿勢一陣，只要唔好持續太長時間就可以。

Text: Mami Editorial

Photo Source: Pinterest