【6個月開始被問有冇牙 擔心BB遲出牙】

及及6個零月開始，聽得最多嘅問題就係：出牙仔未呀？

及及宜家1歲多，只有2隻牙仔⋯⋯同齡嘅媽媽可能會話 “我個BB已經有6-8隻喇”

一般BB六個月左右都已經開始出牙，及及相比起好多BB算係好遲出牙，有屋企人擔心及及唔夠鈣，不過都有人話 “遲出牙咪好囉，遲D甩牙!!”

長輩們曾經質疑人奶唔夠營養，令到及及遲遲唔出牙...本身我都唔係好擔心，講講下我都有懷疑過及及係咪唔夠鈣，不過諗深一層，BB日日都飲奶，奶就係其中最好嘅鈣源，照道理佢哋先係最唔缺鈣架喎！最後，等呀等，等到11個幾月終於等到喇！真係『安樂哂』~

上網做咗好多功課，發現BB出牙遲定早同「鈣」係冇直接關係，「鈣」只會影響牙齒堅固度，出牙遲定早其實遺傳機會可能較大，相信及及遲出牙係遺傳左及爸嘅DNA，到宜家30歲人都仲有2隻BB牙。健康院嘅姑娘都話BB出牙有遲有早，如果唔超過16-18個月出牙就冇問題~

所以媽媽們放鬆D，每個BB都有佢嘅時間表，唔駛過份擔心呢！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：j_and_mama

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！