愛孩子多過愛自己 5件媽媽著緊小孩多過自己嘅事

做女嗰陣無憂無慮，只要顧掂自己就可以，想做咩就做咩，自己開心最緊要；但係當做咗媽媽後，孩子彷彿變成世界嘅中心，媽媽嘅所有時間、心機都主要花喺BB身上，只想將最好嘅都留畀孩子。以下5件日常事都體現到媽媽已經愛孩子多過愛自己：

1. 最好都留畀孩子

媽媽總想將最好嘅嘢都留畀孩子，例如美食都將最大嘅一份分畀仔女，自己只食少少甚至唔食，只要見到孩子心滿意足嘅樣就最開心。

2. 錢都用喺孩子身上

師奶仔性格嘅媽媽喺平時買嘢都會落力格價或講價，只想慳得一蚊得一蚊，有時連買件衫畀自己都唔捨得，但當見到標榜對孩子有益處嘅食物、玩具或教材，媽媽都會毫不猶疑買、買、買！自己咩都可以慳，就係孩子嘅嘢唔慳得！

3. 最緊張孩子嘅健康

買食材愈天然有機愈好、總記掛著要時刻為孩子清潔消毒雙手、雙眼無時無刻都緊盯著孩子有冇危險⋯⋯做媽媽嘅最怕孩子會生病受傷，一旦孩子出事，媽媽都會毫不猶疑將孩子送院治療。但如果媽媽自己有唔舒服，就帶個口罩、隨便買啲藥食就算，與其睇醫生等咁耐，不如爭取時間湊仔。

4. 為湊孩子推卻聚會

由成為媽媽嘅一日開始，媽媽嘅時間都係屬於孩子，無論幾忙幾攰幾羨慕冇孩子嘅朋友都好，媽媽都係放心唔落要扔低孩子畀其他人照顧而自己出去玩或聚會。即使有重要嘅聚會必須出席，媽媽都會成日諗住仔女，心不在焉而無法玩得盡興。

5. 孩子扮靚靚優先

曾幾何時，媽媽都係一個貪靚嘅少女，最鍾意去Shopping買新衫，但成為媽媽後，去親Shopping都淨係掛住買嘢畀孩子，買到靚嘅童裝仲興奮過買靚衫畀自己！每逢出街、節日、活動，媽媽都會花足心思為孩子配搭穿著，但自己就冇時間打扮。

Text: Mami Editorial

Photo Source: Pinterest