母乳多到飲唔晒 擺到就快過期點算好？5個唔浪費嘅處理方法

奶量充足嘅母乳媽媽，最煩惱嘅應該係打開雪櫃之後，發現有堆儲奶袋上嘅有效期就到！明知BB冇可能飲得晒嘅話，不妨將快將到期嘅母乳用於下面5個用途，將所有母乳用得其所，一滴都唔好浪費呀！

1. 同BB沖涼

母乳滋潤度高，係最適合BB使用嘅天然清潔用品，媽媽可以喺BB嘅沖涼浴盆放好水後，倒入一包母乳，如果希望再滋潤啲，可以加入較多分量嘅母乳；如果想清爽啲，就可以減少一啲分量。 如果媽媽介意BB沖涼後有一股母乳嘅奶腥味，可以喺BB泡澡後再用水沖一沖身體。

2. 做面膜

母乳有豐富嘅營養同多元不飽和脂肪酸，具有美容功效，對滋潤肌膚、淡斑，加速乾裂同令受傷嘅肌膚癒合有好大幫助，所以媽媽亦可以用母乳做面膜，用面膜紙浸入母乳內，然後敷上面部10至15分鐘，有非常唔錯嘅滋潤效果。

3. 製作BB副食品

如果BB已經到咗加固嘅月齡，媽媽可以用母乳製作BB嘅糊仔，8個月以上嘅BB更可以食母乳加蛋黃製作而成嘅母乳布甸！不過媽媽要記得母乳中嘅活細胞同抗體係唔能夠抵受高溫，所以喺烹調過程中最好將母乳嘅加熱溫度維持喺60度以下，或喺副食品放涼後先加入母乳，令母乳嘅所有活性成分都可以保留到。

4. 製作母乳皂

如果媽媽認為快將過期嘅母乳唔多，而直接倒晒畀BB沖涼太奢侈嘅話，亦可以選擇將母乳入皂，只需少量母乳就可以製作到多塊母乳皂，令BB可以長期用母乳沖涼。

5. 製作母乳飾品

最近坊間都有好多製作母乳飾品嘅工作坊，將母乳化為一件件精緻嘅首飾或擺設，甚具紀念價值！

Text: Mami Editorial

Photo Source： Pinterest