【10x10級痛苦一心以為就生得但原來只係假象】

By Shan Shan on 24 Oct 2018

回想起催生過程真係10x10級痛苦！

12/11 當日因為係老公生日，所以我哋好輕鬆過咗呢一日遊，但當晚我已經全晚陰陰痛，不過第二日我要返醫院住產檢，所以我們都無咩理會。

13/11 當日早上如常去醫院做檢查，我仲同助產士講我有經痛感覺已經有這2-3日啦，助產士仲講笑咁講，係呀，咁應該係BB已經READY要出嚟啦，你自己留意下啦，之後我就返由醫院慢步返屋企當做運動。當晚食飯我仲同屋企人講返呢件事，緊張大師99 立即叫我入院啦，唔好等啦，佢當年都係咁第二日就生左啦，好啦！咁我入啦，其實第一次住醫院真係好得人驚！

14/11 住咗一晚已經無晒痛嘅感覺，好想出院，但屋企人堅持唔比⋯⋯唉！！！咁我繼續住啦，但又唔痛，都唔知點解仲要住院！

15/11 上午8點左右起身，跟住有個姑娘走過嚟話一陣有醫生過嚟同我檢查，醫生過嚟同我指探咗就話我有條件可以催生，跟住叫我食埋早餐好去對面做催生，立即打比老公同佢講！點知佢嚟到我就要過去催生個邊！因為之前檢查完轉頭就已經見紅，之後過咗另一邊比醫生穿水同吊催生藥，慢慢由經痛嘅感覺變做所謂嘅陣痛，隔離床個個痛到叫咗出嚟嘅時候，我仲懷疑有無咁痛丫？我實唔會咁叫嘅！

點知去到2-3點陣痛嘅感覺就開始好明顯，雖然未至於令我大叫，但都令我攣哂同勁唔舒服，去到4點幾個陣檢查已開2度，但一痛我就忍唔住叫咗出嚟！我心諗痛到咁先得2度，無嘢丫嗎？！跟住5點幾開始越痛越密，以為係就生得，痛到忍唔住大叫之外仲要求坐生產球，但好彩呢個時候奶奶偷偷上嚟睇下我，痛嘅時候比隻手我練下，又幫我按摩，如果唔係都捱唔到！

不過5點幾至8點開始簡直係痛不欲生，其間仲一度話我唔想生啦、不如打止痛針、打無痛分娩！咩說話都比我講過晒，但醫院都彩我都傻，直到老公8點多d嚟度，我仲要求開刀生，因為真係太痛啦！護士緊係彩你都有味道啦，只係問你要唔要聞笑氣丫（可能答唔要嘅人就會由得你）

既然你唔比我打針同開刀，咁我幾帶都拎返少少著數，聞就聞啦！不過初初聞咗都無咩感覺，都唔止痛嘅！又唔暈！都唔知聞嚟仲咩！之後老公坐咗一陣護士就話要交更要佢出去，我喊住同護士講無咗老公我捱唔到，佢唔出去得唔得！
9:00左右再check 開咗幾多度，得3度，天呀！痛不欲生先開多咗1度，無病丫！阿仔點解你要咁對我？等到9點半老公入返嚟不停安撫我，但我個人都迷迷地又痛到想死！

之後個2個鐘我就暈陀陀咁，不停吸住笑氣，不停痛到抽搐痛到雙腳震晒咁過咗，喊住問老公幾點，幾時可以再檢查開到幾多到，叫護士嚟話轉開刀啦，我頂唔順，但護士都不為所動，只係入嚟望我2眼話我有條件可以順產，忍多一陣啦，好快過架啦，去到11點幾，我聽到佢講開得好好啦，再忍多陣，就快可以生得啦，我信以為真，以為已經夠10度，過咗一陣我聽到佢講開得好好啦！恭喜你可以落產房啦！

11點我被推入產房，一心以為入去就生得！
點知入到去又要我自己過床又要我瞓係度等，我先知原來我未夠10度只係得8度可以落去產房度等咋！我再問要等幾耐佢哋話最快都要等個半鐘啦，跟住我又要求老公入嚟佢哋話未生得唔入得嚟，咁痛都唔比佢入嚟陪我，咁叫咩陪產？當然我無講出口只係默默接受。

呢1小時陣痛唔比縮埋個人（話會令bb缺氧）只可以攤直個人（跟本就無可能）仲唔比叫，但要聽到隔離房個個生嘅時候係咁叫話唔生好痛！醫生護士都鬧佢唔準叫出聲，我就嚇到又痛又唔敢叫又唔敢搵人，好在我1點左右出聲問，好辛苦啦可以生未，跟住個唔知醫生定護士走過嚟話做埋呢個啦，佢應該出得嚟啦！跟住轉頭就見到老公，我就知道快啦，就嚟生啦，唔洗再痛啦！好快同小寶寶見面啦！

就位後醫生叫我用力，一開始痛我就用力，合埋口唔出聲，用咗2-3下力之後我感覺到bb個頭已經頂住我啦，但無咗痛嘅感覺，醫生就話等下一下痛再用力，我就話唔得啦，佢頂住咗我我用唔到力，跟住就有人係下面度整下轉下，用多幾下力我感覺到個頭出咗嚟，跟住就好似有人將一陀嘢拉咗出嚟，跟住問我係仔定女，老實講近視睇唔到只敷衍講仔，佢再叫我帶眼鏡睇清楚佢個JJ，之後就將抺乾淨嘅小b放係我心口，以為咁就完滿結束，少年你太年輕了！