見到BB做呢4件事 唔知好嬲定好笑

有時媽媽行開行埋（唔係獨留小朋友喺屋企呀），轉過頭BB就會做咗啲出其不意嘅事。媽媽見到嗰下真係唔知好嬲定好笑，雖然要做一輪善後工作，但見到BB當時個樣咁搞笑又鬧佢唔落。你嘅BB有冇做過以下4件事？

1. 掹到一地紙巾

唔知點解BB對紙巾特別情有獨鐘，細細個揸住包紙巾喺手可以玩好耐，到大少少如果紙巾喺佢附近就大件事，佢一定猛咁掹紙巾。見到BB掹到一地紙巾，畀紙巾包圍嗰吓只有無奈，嘥晒啲紙巾！

2. 搽到成身cream

BB模仿力驚人，見到媽媽開唔同瓶瓶罐罐嘅護膚品搽面，或者幫BB搽，一於有樣學樣，趁媽媽唔覺意搽到成面甚至成身都係，仲要周圍都有啲。啲cream黐立立媽媽好難洗得乾淨，最好BB唔係搽咗啲貴價cream，如果唔係好肉赤。

3. 畫到花面貓

媽媽諗住畀BB畫下畫，提升創意同藝術感，只係去個廁所嘅時間，BB已經將自己畫到花面貓。更「好彩」係BB將顏色畫到枱櫈、牆壁、地下⋯⋯笑完佢個樣仲有排抹。

4. 爬入箱塞住

BB對啲箱同盒好有情意結，總之一見到有箱就想爬入去，有時入到又出唔番嚟，塞住咗起唔到身，不斷求救，見到佢咁狼狽，笑咗先去救佢。

Text: Mami Editorial