膠布等4樣用品 建議放喺媽媽跟身化妝袋

BB出世之後，媽媽們嘅靚靚手袋會換成奶粉袋之外，到小朋友開始學行，周圍跌跌撞撞嘅時候，連媽媽嘅化妝袋都要變身做急救箱。以下嘅急救小法寶，相信好多媽媽都會常備喺佢地嘅化妝袋入面。

1. 膠布

擦損嘅傷口，清潔好之後貼上膠布，除左可以減低傷口接觸到細菌嘅機會，如果係有公仔圖案嘅膠布，有時或者仲會有止痛嘅魔法功效。

2. 傷口消毒藥水（獨立包裝）

貼膠布之前可以用消毒生理鹽水或者傷口消毒藥水洗乾凈傷口，雖然可用煮過嘅冷開水或樽裝礦泉水代替，不過傷口消毒藥水可以殺菌，唔怕之後發炎，咁就放心得多啦。

3. 止痕藥膏

   因為小朋友比較惹蚊，容易比蚊咬到，帶備定止痕嘅藥膏，就唔怕佢地不停講「好痕呀」同埋抓損喇。

4. 薰衣草精油

最近聽到唔少媽媽愛上薰衣草精油，仲大讚佢係急救嘅好幫手，原來因為薰衣草精油可以消腫、止血、殺菌、同埋幫助傷口癒合，佢嘅香味仲可以安撫小朋友受傷後嘅不安情緒，所以有啲媽媽出街都會帶備一小支旁身。不過，如果要用精油，特別係用喺小朋友身上嘅話，一定要留意精油店舖嘅信譽同產品品質，仲要留意產品用法指引呀。

Text: Mami Editorial