點解孩子唔能夠好好相處？好多時係由大人一手造成 3個大人常踩中嘅地雷

唔知點解，大嘅孩子同小嘅孩子相處時總係好似唔咬弦咁，一時又爭玩具，一時又互相推撞，令父母頭痛不已，但父母又有冇諗過，其實小朋友會唔鐘意對方，有可能係由父母一手造成呢？不妨回想一下，自己有冇曾經對孩子做過以下呢3件事。

1. 只關注年幼嘅一方

喺大人眼中，較年幼嘅孩子會較脆弱，需要更多呵護同幫助。例如喺飲食方面，大孩子可以自行進食，大人就唔會多加理會，但就會逐匙餵小孩子。雖然係孩子自理能力嘅差異而令大人有唔同嘅對待方法，但大孩子並唔會明白自己同小孩子嘅能力有咩分別，只會覺得大人都只對小孩子熱心，反而冷落自己。

2.要求孩子大讓細

大人都會理所當然認為，大孩子就係哥哥／姐姐，有責任照顧弟弟妹妹，所以好多時都會要求大孩子遷就小孩子，對於本來集萬千寵愛在一身嘅大孩子嚟說，忽然大人嘅愛同關注都被小孩子搶走，連自己都要被迫遷就小孩子，難免會心裡難受，甚至對小孩子產生憤怒、嫉妒等情緒，認為係小孩子搶走自己嘅一切，而更唔想讓小孩子，如果爸爸媽媽呢個時候迫大孩子道歉或故意斥責，更會惹起大孩子反感。

3.比較孩子

大人為咗激勵孩子，好多時會有比較性嘅說話畀孩子聽，例如：「你睇下XX食得幾快！」、「你學下人啦！」、「你要似XX咁乖呀！」傳入孩子嘅耳中，就變成自己不如人優秀，加深二人之間嘅競爭感，而被認為做得唔好嘅一方更會覺得傷心。

Text: Mami Editorial