小朋友啱啱開始學行嘅時候，最容易受傷，屋企啲膠布都用得特別快。

小朋友初初學行嘅時候，跌跌撞撞，擦損撞傷在所難免。最常受傷嘅位置相信係以下三個。

1. 膝頭哥

無論係企唔穩、行唔穩、跑得太快失左平衡，跌到嘅時候，好多時都係擦損膝頭哥。有時會瘀左一撻，有時如果係石地，就會擦損而且流血。小朋友嘅膝頭哥，相信係受傷排行榜第一位。

2. 額頭

差不多每個小朋友都有撞到過頭部，差別只係在於撞過幾多次，而額頭亦都係最常撞到嘅部位。

3. 門牙

小朋友撞到面部嘅時候，最常撞到門牙，如果唔好彩成隻牙甩左出黎，可以放喺一個容器入面，要用口水或者凍牛奶浸住，然後睇牙醫嘅時候帶埋去。

跌跌撞撞嘅受傷，好難完全避免，都係成長嘅一部分，最緊要幫小朋友清潔好傷口，等佢地快啲好番。

Text: Mami Editorial